जेनजी आन्दोलनमा ज्यान गुमाउनेहरू सहिद घोषणा, परिवारलाई १५ लाख राहत

काठमाडौं । भदौ २३ र २४ गते भएको जेनजी आन्दोलनमा ज्यान गुमाउनेहरूलाई सरकारले सहिद घोषणा गरेको छ । मन्त्रिपरिषद् विस्तार पछि बसेको आजको बैठकले यस्तो निर्णय गरेको गृहमन्त्री ओमप्रकाश अर्यालले जानकारी दिएका छन् ।

गृहमन्त्री अर्यालका अनुसार ज्यान गुमाउनेहरूको राष्ट्रिय सम्मानसहित अन्त्येष्टि गरिनेछ भने असोज १ गतेलाई शोक दिवसका रूपमा मनाइनेछ ।

सरकारले पीडित परिवारलाई पहिले नै दिँदै आएको १० लाख रुपैयाँसहित थप ५ लाख प्रदान गर्ने निर्णय गरेको छ, जसअनुसार प्रत्येक परिवारलाई १५ लाख रुपैयाँ राहत दिइनेछ । यो रकम अर्थ मन्त्रालयमार्फत निकासा गरी सम्बन्धित जिल्ला प्रशासन कार्यालयमार्फत वितरण गरिनेछ ।

यदि ज्यान गुमाउनेहरू दुर्गम जिल्लाका हुन् भने, अन्त्येष्टिका लागि आवश्यक यातायात तथा हवाई खर्च समेत सरकारले बेहोर्नेछ ।

घाइतेहरूको निःशुल्क उपचार जारी राख्ने निर्णय पनि मन्त्रिपरिषद्को बैठकले गरेको छ । साथै, आन्दोलनमा दमन भएको भनी उठेका आरोपहरूको छानबिन गर्न न्यायिक जाँचबुझ आयोग गठन गरिनेछ ।

सरकारले ज्यान गुमाएका जेन्जीहरूको स्मृतिमा ूजेन्जी जागरण स्मारक पार्कू निर्माण गर्ने निर्णय पनि गरेको छ । यसको लागि उपयुक्त स्थान खोजीको प्रक्रिया थालिनेछ ।