जेनजी आन्दोलनमा ज्यान गुमाएका तीन प्रहरीलाई राष्ट्रिय सम्मानसहित अन्त्येष्टि

काठमाडौं । जेनजी प्रदर्शनका क्रममा ज्यान गुमाएका तीन प्रहरीलाई शुक्रबार राष्ट्रिय सम्मानसहित अन्त्येष्टि गरिएको छ । उनीहरूको पार्थिव शरीरलाई पशुपति आर्यघाटमा सलामी अर्पण गरी अन्तिम संस्कार गरिएको हो ।

२४ भदौको घटनामा प्रदर्शन नियन्त्रण गर्ने क्रममा काठमाडौंमा तीन प्रहरीको मृत्यु भएको थियो । ड्युटीमा खटिएका असई मिलन राय र जवान उत्तम थापामाथि महाराजगञ्जमा जम्मा भएका प्रदर्शनकारीले आक्रमण गरेका थिए । हिरासत व्यवस्थापनमा खटिएका असई राय प्रदर्शनकारीको आक्रमणमा परे । उनलाई जोगाउने क्रममा जवान थापा पनि मारिएका थिए ।

सोही दिन कोटेश्वरमा प्रदर्शन नियन्त्रणका लागि खटिएका सहायक हवल्दार अमृत गुरुङ प्रदर्शनकारीको आक्रमणमा परी ज्यान गुमाएका थिए ।

उनीहरुको बलिदानप्रति सम्मान व्यक्त गर्दै प्रहरी संगठनका वरिष्ठ अधिकृतहरूले अन्त्येष्टि कार्यक्रममा श्रद्धाञ्जली अर्पण गरेका थिए । उपस्थित सुरक्षाकर्मीहरूले शोक सन्देश दिँदै तीनैजनालाई ‘कर्तव्यपालनका वीर’को रूपमा स्मरण गरेका थिए ।

स्थानीय बासिन्दाले पनि उनीहरूको योगदानप्रति सम्मान प्रकट गर्दै प्रहरीको बलिदानलाई नबिर्सनुपर्ने बताएका छन्।