२५ जिल्लामा यातायात पूर्ण बन्द, २७ जिल्लामा राति रोक

काठमाडौं । लगातारको भारी वर्षाका कारण सडकमा जोखिम बढेपछि आज (शनिबार) देशका २५ जिल्लामा सवारीसाधन सञ्चालन पूर्ण रूपमा रोक लगाइएको छ । सडक विभागले सूचना जारी गर्दै जोखिमयुक्त सडकमा यातायात आवागमन बन्द गर्ने निर्णय गरेको जनाएको हो । ।

विभागका अनुसार हुम्ला, मुगु, डोल्पा, मुस्ताङ, बाजुरा, कालिकोट, डोटी, अछाम, सुर्खेत, सल्यान, बाँके र बर्दियासहित २५ जिल्लामा सवारीसाधन सञ्चालनमा पूर्ण रोक लगाइएको छ ।

त्यस्तै, थप २७ जिल्लामा रातिको समयमा सवारीसाधन चलाउन प्रतिबन्ध लगाइएको छ । राति यातायात बन्द हुने जिल्लामा दोलखा, सिन्धुपाल्चोक, काभ्रे, रसुवा र धादिङलगायत रहेका छन् ।

अन्य २५ जिल्लाका सडकमा भने उच्च सतर्कता अपनाएर मात्रै सवारीसाधन सञ्चालन गर्न सडक विभागले आग्रह गरेको छ ।

भारी वर्षाका कारण सडक तथा पुलमा बाढी, पहिरो र अन्य जोखिम बढ्न सक्ने भएकाले यात्रा गर्दा आवश्यक सावधानी अपनाउन विभागले सर्वसाधारणलाई अनुरोध गरेको छ । जोखिमयुक्त सडकमा अनावश्यक यात्रा नगर्न तथा सम्बन्धित निकायको सूचना पालना गर्नसमेत विभागले आग्रह गरेको छ ।