समस्याग्रस्त सहकारीका साना बचतकर्तालाई राहत, रकम फिर्ता वितरण सुरु

काठमाडौं । समस्याग्रस्त सहकारी व्यवस्थापन समितिले समस्याग्रस्त सहकारीका बचतकर्तालाई रकम फिर्ता दिन सुरु गरेको छ । समितिले सोमबार पहिलो चरणमा तीन सहकारी संस्थाका ३ सय ७८ जना साना बचतकर्तालाई बचत रकम फिर्ता गरेको हो ।

समितिका अनुसार कान्तिपुर सहकारीका २ सय १५ जना, शिवशिखर बहुउद्देश्यीय सहकारीका १ सय ५६ जना र पशुपति सहकारीका ७ जना बचतकर्ताले आफ्नो रकम फिर्ता पाएका छन् ।

समितिले पहिलो दिन कम रकम बचत गरेका बचतकर्तालाई प्राथमिकतामा राखेर भुक्तानी गरिएको जनाएको छ । आगामी दिनमा भने बचत रकमको आधारमा वर्गीकरण गर्दै चरणबद्ध रूपमा रकम फिर्ता गरिने बताइएको छ ।

समस्याग्रस्त सहकारीमा फसेको बचत रकम फिर्ता गर्नुपर्ने दायित्व ठूलो रहेको समितिको भनाइ छ । समितिका अनुसार करिब ७६ हजार बचतकर्ताको झण्डै ४६ अर्ब रुपैयाँ फिर्ता गर्न बाँकी छ ।

त्यसमध्ये अधिकांश साना बचतकर्ता रहेका छन् । पाँच लाख रुपैयाँभन्दा कम बचत गर्नेहरूलाई साना बचतकर्ता र पाँच लाखभन्दा बढी बचत गर्नेहरूलाई ठूला बचतकर्ताका रूपमा वर्गीकरण गरिएको छ । समितिका अनुसार कुल बचतकर्तामध्ये १८ हजार जनाले पाँच लाख रुपैयाँभन्दा बढी रकम बचत गरेका छन् ।