विदेशी महिलासँग जोडिएको विवाद संसदमा, रास्वपाका सांसद कार्कीमाथि छानबिन माग

काठमाडौं । प्रतिनिधि सभा बैठकमा सत्तारुढ दल राष्ट्रिय स्वतन्त्र पार्टी (रास्वपा) का सांसद कृष्णकुमार कार्कीसँग जोडिएको व्यक्तिगत विवादको विषयले प्रवेश पाएको छ । विपक्षी सांसदहरूले सामाजिक सञ्जालमा भाइरल बनेको घटनाबारे सरकार र सम्बन्धित सांसदबाट स्पष्ट जवाफ माग गरेका छन् ।

मोरङ–२ बाट निर्वाचित सांसद कृष्णकुमार कार्कीले एक नाइजेरियन महिलालाई प्रेम सम्बन्धमा पारेर गर्भवती बनाएपछि सम्पर्कविहीन भएको आरोप सामाजिक सञ्जालमा व्यापक रूपमा चर्चामा आएको छ । उक्त विषयलाई लिएर संसदमा प्रश्न उठेपछि सदनको वातावरण केही समय तातिएको थियो ।

प्रतिनिधि सभा बैठकमा बोल्दै पार्वती विकले सत्तारुढ दलका सांसदसँग जोडिएको भनिएको घटनाबारे सत्यतथ्य सार्वजनिक गर्न माग गरिन् । उनले सामाजिक सञ्जालमा फैलिएको विषयले संसदको मर्यादा र जनप्रतिनिधिको आचरणमाथि प्रश्न उठाएको भन्दै सरकार र सम्बन्धित पक्षले स्पष्ट धारणा ल्याउनुपर्ने बताइन् ।

त्यस्तै निनुकुमारी कर्णले विदेशी महिलालाई भावनात्मक रूपमा प्रयोग गरिएको आरोप सार्वजनिक भइरहेका बेला सदन मौन बस्न नहुने धारणा राखिन् । उनले महिलामाथि हुने व्यवहार र जनप्रतिनिधिको नैतिक जिम्मेवारीबारे प्रश्न उठाउँदै घटनाको निष्पक्ष छानबिन हुनुपर्ने माग गरिन् ।

सांसद कर्णले “विदेशी महिलासँग यस्तो व्यवहार गर्ने व्यक्तिले आफ्नै देशका महिलालाई कस्तो सम्मान गर्लान् ?” भन्दै गम्भीर प्रश्न उठाएकी थिइन् । उनले घटनाबारे संसदलाई यथाशीघ्र जानकारी गराउन सभामुखमार्फत सरकारको ध्यानाकर्षण समेत गराइन् ।

उक्त विषयमा हालसम्म सांसद कृष्णकुमार कार्की वा राष्ट्रिय स्वतन्त्र पार्टीले औपचारिक प्रतिक्रिया सार्वजनिक गरेका छैनन् । सामाजिक सञ्जालमा भने घटनाबारे विभिन्न दाबी र टिप्पणीहरू भइरहेका छन् ।