श्रम संस्कृति पार्टीमा सुदन किराती, साम्पाङले गरे स्वागत

काठमाडौं । पूर्वपर्यटन मन्त्री तथा प्रगतिशील लोकतान्त्रिक पार्टीका अध्यक्षमण्डल सदस्य सुदन किराती औपचारिक रूपमा हर्क साम्पाङ नेतृत्वको श्रम संस्कृति पार्टीमा आबद्ध भएका छन् । शुक्रबार काठमाडौंको बागबजारमा आयोजित कार्यक्रममा किरातीसहित उनका समर्थक समूह श्रम संस्कृति पार्टीमा प्रवेश गरेका हुन् ।

पार्टी प्रवेशसँगै किरातीलाई वरिष्ठ नेताको जिम्मेवारी दिइएको छ । सहमतिअनुसार उनी पार्टीको दोस्रो वरीयतामा रहने गरी उपाध्यक्षको भूमिकासमेत सम्हाल्नेछन् । श्रम संस्कृति पार्टीले आगामी प्रदेश सभा निर्वाचनलाई लक्षित गर्दै कोशी प्रदेशमा आफ्नो राजनीतिक प्रभाव विस्तार गर्ने रणनीतिअन्तर्गत किरातीलाई नेतृत्व तहमा भित्र्याएको बताइएको छ ।

पार्टी स्रोतका अनुसार किरातीले आगामी प्रदेश सभा निर्वाचनपछि कोशी प्रदेशको मुख्यमन्त्री बन्ने लक्ष्यसहित श्रम संस्कृति पार्टी रोजेका हुन् । लामो समयदेखि चलिरहेको राजनीतिक संवादपछि शुक्रबार हर्क साम्पाङ र किरातीबीच औपचारिक सहमति भएको हो ।

सहमति अनुसार किराती पक्षले पार्टीभित्र एक उपाध्यक्ष, एक सचिव र १५ जना केन्द्रीय सदस्यको प्रतिनिधित्व पाउनेछन् । किरातीसँगै प्रवेश गरेका केही नेताहरूलाई केन्द्रीय समितिमा समेट्ने तयारीसमेत भइरहेको जनाइएको छ ।

यसअघि प्रगतिशील लोकतान्त्रिक पार्टी परित्याग गरेका किराती पछिल्लो समय वैकल्पिक राजनीतिक शक्ति निर्माणको प्रयासमा सक्रिय थिए । उनले गत फागुन २१ गते सम्पन्न निर्वाचनमा श्रम संस्कृति पार्टीका उम्मेदवारलाई खुलेर सहयोग गरेका थिए ।

किरातीको समर्थनपछि श्रम संस्कृति पार्टीले कोशी प्रदेशका केही क्षेत्रमा उल्लेखनीय सफलता हासिल गरेको थियो । सुनसरी–१ बाट हर्कराज राई, भोजपुरबाट ध्रुवराज राई तथा खोटाङबाट आरेन राई निर्वाचित भएका थिए । पार्टीभित्र किरातीको आगमनले संगठन विस्तार र पूर्वी नेपालमा जनाधार मजबुत बनाउन थप ऊर्जा मिल्ने श्रम संस्कृति पार्टीका नेताहरूको दाबी छ ।