उपत्यकामा ट्राफिक चेकजाँच कडा, दुर्घटना न्यूनीकरणका लागि विशेष अभियान

काठमाडौं । काठमाडौं उपत्यका ट्राफिक प्रहरी कार्यालयले काठमाडौं उपत्यकामा बढ्दो सवारी चापसँगै दुर्घटनाका घटना बढ्न थालेपछि ट्राफिक नियम कार्यान्वयनमा कडाइ गरेको छ । मुख्य सडक, व्यस्त चोक तथा उपत्यका प्रवेश गर्ने प्रमुख नाकाहरूमा विशेष चेकजाँच अभियान सञ्चालन गरिएको प्रहरीले जनाएको छ ।

विशेषगरी नागढुङ्गा, कलङ्की, कोटेश्वर, चाबहिल, जडीबुटी, बल्खु, महाराजगञ्ज र नयाँ बसपार्क क्षेत्रमा ट्राफिक निगरानी बढाइएको छ । यात्रुवाहक तथा मालवाहक सवारीसाधनलाई लक्षित गर्दै क्षमता भन्दा बढी यात्रु बोक्ने, मापसे गरेर गाडी चलाउने, तीव्रगति गर्ने तथा प्राविधिक रूपमा कमजोर सवारीमाथि निगरानी कडा पारिएको जनाइएको छ ।

ट्राफिक प्रहरीले सडक सुरक्षालाई प्राथमिकतामा राख्दै चालक तथा यात्रु दुवैलाई जिम्मेवार बन्न आग्रह गरेको छ । पछिल्लो समय हुने अधिकांश दुर्घटनामा चालकको लापरबाही, अनियन्त्रित गति, मोबाइल प्रयोग गर्दै सवारी चलाउने तथा जोखिमपूर्ण ओभरटेक मुख्य कारण देखिएको प्रहरीको भनाइ छ ।

अभियानको नेतृत्व स्वयम् कार्यालय प्रमुख एवं प्रहरी वरिष्ठ उपरीक्षक नवराज अधिकारीले गरिरहेका छन् । उनी दिउँसोदेखि रातिसम्म विभिन्न सडक क्षेत्रमा पुगेर ट्राफिक व्यवस्थापन, सवारी जाँच तथा चालकलाई सचेतना दिने कार्यमा सक्रिय रहेका छन् ।

नागढुङ्गा नाकामा गरिएको अनुगमनका क्रममा ट्राफिक प्रहरी प्रमुख अधिकारीले सार्वजनिक सवारी चालकलाई यात्रुको सुरक्षामा विशेष ध्यान दिन निर्देशन दिएका छन् । उनले सवारीसाधनको नियमित प्राविधिक परीक्षण गर्न, सिट क्षमताभन्दा बढी यात्रु नराख्न तथा ट्राफिक नियमको पूर्ण पालना गर्न आग्रह गरे ।

ट्राफिक प्रहरीका अनुसार लामो दूरीका सार्वजनिक सवारीसाधनको अवस्था, चालकको स्वास्थ्य परीक्षण तथा यात्रु सुरक्षासम्बन्धी मापदण्डमाथि पनि निगरानी थालिएको छ । विशेष टोली परिचालन गरी रातिको समयमा समेत चेकजाँच अभियान सञ्चालन भइरहेको जनाइएको छ ।

सडक अनुशासन कायम गर्न ट्राफिक प्रहरीले विद्यालय, कलेज तथा सार्वजनिक स्थलमा सचेतनामूलक कार्यक्रमसमेत सञ्चालन गरिरहेको छ । युवापुस्तालाई लक्षित गरी ट्राफिक नियमसम्बन्धी जानकारी, सुरक्षित यात्रा र दुर्घटना न्यूनीकरणका उपायबारे प्रशिक्षण दिइँदै आएको प्रहरीले जनाएको छ ।

उपत्यकामा सवारीको अत्यधिक चापले सडक व्यवस्थापन चुनौतीपूर्ण बन्दै गएको अवस्थामा ट्राफिक प्रहरीले आगामी दिनमा अभियानलाई अझ प्रभावकारी बनाउने तयारी गरेको छ । कार्यालयले सुरक्षित, व्यवस्थित र अनुशासित यातायात प्रणाली विकास गर्ने उद्देश्यले चेकजाँच तथा जनचेतना कार्यक्रमलाई निरन्तरता दिइने जनाएको छ ।