नयाँ सरकारलाई नेकपाको बधाई, मन्त्रिपरिषद्को निर्णयप्रति चिन्ता

काठमाडौं । नेपाली कम्युनिस्ट पार्टी (नेकपा) ले नवनियुक्त प्रधानमन्त्री बालेन्द्र शाह तथा उनको नेतृत्वमा गठन भएको मन्त्रिपरिषद्लाई बधाई तथा शुभकामना व्यक्त गरेको छ । फागुन २१ गते सम्पन्न प्रतिनिधि सभाको निर्वाचनमा बहुमत हासिल गरेपछि प्रधानमन्त्री बनेका शाहको सफल कार्यकालको कामना पार्टीले गरेको हो ।

शनिबार कोटेश्वरस्थित केन्द्रीय कार्यालयबाट जारी प्रेस विज्ञप्तिमा नेकपाले नयाँ सरकारबाट जनताको अपेक्षा अनुसार काम हुने विश्वास व्यक्त गरेको छ । साथै, सरकारको प्रभावकारी र सफल सञ्चालनको शुभेच्छा पनि व्यक्त गरिएको छ ।

यद्यपि, बधाईसँगै पार्टीले मन्त्रिपरिषद्को पहिलो बैठकबाट गरिएको एक निर्णयप्रति गम्भीर ध्यानाकर्षण भएको जनाएको छ । भदौ २३ र २४ का घटनाको छानबिनका लागि गठित कार्की आयोगको प्रतिवेदन कार्यान्वयन गर्ने क्रममा सरकारले चालेको कदममाथि पार्टीले प्रश्न उठाएको हो ।

केन्द्रीय कार्यालयका तर्फबाट गणेशमान पुनद्वारा हस्ताक्षरित विज्ञप्तिमा सरकारले कुनै पनि निर्णय गर्दा विधिको शासन, कानुनी प्रक्रिया र निष्पक्षताको मर्मलाई कायम राख्नुपर्नेमा जोड दिइएको छ । साथै, राजनीतिक पूर्वाग्रह वा द्वन्द्व निम्त्याउने कार्य नगर्न सरकारलाई सचेत गराइएको छ ।

शुक्रबार बसेको मन्त्रिपरिषद् बैठकले कार्की आयोगका सिफारिसअनुसार केही राजनीतिक नेतृत्वविरुद्ध कारबाही प्रक्रिया अघि बढाउने निर्णय गरेको थियो । सो निर्णयपछि तत्कालीन प्रधानमन्त्री केपी शर्मा ओली र कांग्रेस नेता तथा पूर्व गृहमन्त्री रमेश लेखक पक्राउ परेका छन् ।

यस घटनापछि एमालेले देशभर विरोध कार्यक्रम सुरु गरेको छ भने नेकपाले कसैको नाम नलिई समग्र परिस्थितिप्रति आफ्नो चासो र चिन्ता व्यक्त गरेको छ ।