ब्राजिलको क्याम्पियोनातो मिनेरो फाइनलमा कुटाकुट, २३ खेलाडीलाई रातो कार्ड

काठमाडौं । ब्राजिलको राज्यस्तरीय प्रतिष्ठित फुटबल प्रतियोगिता क्याम्पियोनातो मिनेरोको फाइनल खेलमा ठूलो झडप भएपछि दुवै टोलीका गरी २३ खेलाडीलाई रातो कार्ड देखाइएको छ । खेलको अन्त्यतिर भएको झडपका कारण मैदान तनावपूर्ण बनेको थियो ।

सोमबार भएको फाइनलमा क्रुजेरो इस्पोर्टे क्लब र एट्लेटिको मिनेरो क्लबबीच प्रतिस्पर्धा भएको थियो । खेल ब्राजिलको चर्चित मिनेराओ स्टेडियममा आयोजना गरिएको थियो । निर्धारित समयको खेलमा क्रुजेरोले १–० गोलको जित निकाल्दै उपाधि हात पार्यो ।

खेलको अधिकांश समय प्रतिस्पर्धात्मक भए पनि अन्तिम चरणमा खेलाडीहरूबीच विवाद बढ्दै गएपछि अवस्था नियन्त्रण बाहिर गएको थियो । मैदानमा दुवै टोलीका खेलाडीहरूबीच धक्का–मुक्का, तानातान र हात हालाहालसम्मको स्थिति बनेपछि खेल केहीबेर अवरुद्धसमेत भएको थियो ।

टक्करपछि सुरु भयो झडप
झडप क्रुजेरोका मिडफिल्डर क्रिस्टियन र एट्लेटिको मिनेरियोका गोलकिपर एभर्सनबीचको टक्करबाट सुरु भएको बताइएको छ ।

टक्करपछि एभर्सनले क्रिस्टियनलाई धक्का दिँदै प्रहार गरेपछि दुवै टोलीका खेलाडीहरू एकअर्कातर्फ आक्रामक रूपमा उत्रिएका थिए । केहीबेरमै मैदानमा रहेका अधिकांश खेलाडीहरू झगडामा संलग्न भएपछि स्थिति झन् जटिल बनेको थियो ।

२३ खेलाडीलाई रातो कार्ड
खेलका रेफ्री माथेउस क्यानडान्सानले झडप अत्यन्त ठूलो भएकाले तत्काल सबै खेलाडीलाई मैदानमै कार्ड देखाउन सम्भव नभएको बताएका छन् । खेलपछि तयार पारिएको आधिकारिक प्रतिवेदनमा भने कुल २३ खेलाडीलाई रातो कार्ड दिइएको उल्लेख गरिएको छ ।

प्रतिवेदनअनुसार क्रुजेरोका १२ खेलाडी—कासियो, फाग्नेर, फाब्रिसियो ब्रुनो, जोआओ मार्सेलो, विलाल्बा, काउआ प्रातेस, क्रिस्टियन, लुकास रोमेरो, मातेउस एनरिके, वालेस, गेर्सन र काइओ जोर्जे—निष्कासित भएका छन् ।

त्यसैगरी एट्लेटिको मिनेरियोका ११ खेलाडी—एभर्सन, गाब्रिएल डेल्फिम, प्रेसीआदो, ल्याङ्को, रुआन ट्रेसोल्डी, जुनियर अलोन्सो, रेना लोदी, एलान फ्रान्को, एलान मिन्डा, कासिएरा र हल्कलाई पनि रातो कार्ड देखाइएको छ ।

अनुशासनात्मक कारबाहीको सम्भावना
घटनापछि ब्राजिलियन फुटबल अधिकारीहरूले थप अनुसन्धान गर्ने बताएका छन् । झडपमा संलग्न खेलाडीहरूलाई आगामी खेलमा निलम्बन, जरिवाना वा थप अनुशासनात्मक कारबाही हुन सक्ने सम्भावना रहेको छ ।

फुटबल विश्लेषकहरूका अनुसार एकै खेलमा यति धेरै खेलाडी निष्कासित हुनु अत्यन्त दुर्लभ घटना हो । यद्यपि विश्व फुटबल इतिहासमा सबैभन्दा धेरै रेड कार्ड देखाइएको घटना सन् २०११ मा अर्जेन्टिनामा भएको खेलमा भएको थियो ।

त्यसबेला क्लब एट्लेटिको क्लेपोले र भिक्टोरियानो अरेनासबीचको खेलमा भएको झडपपछि रेफ्रीले दुवै टोलीका खेलाडी र बेन्चका सदस्यसहित कुल ३६ जनालाई रातो कार्ड देखाएका थिए ।

ब्राजिलको यो घटना पनि पछिल्ला वर्षहरूमा फुटबल मैदानमा भएको सबैभन्दा ठूलो झडपमध्ये एक मानिएको छ ।