प्रतिनिधि सभा निर्वाचनमा सहभागी हुन राष्ट्रपतिको आह्वान

काठमाडौं । रामचन्द्र पौडेलले आसन्न प्रतिनिधि सभा सदस्य निर्वाचनमा सक्रिय सहभागिता जनाउन सम्पूर्ण नागरिकलाई अपिल गरेका छन् । सोमबार साँझ राष्ट्रका नाममा सम्बोधन गर्दै उनले फागुन २१ गते हुने निर्वाचनलाई नेपालको राजनीतिक इतिहासको जटिल अवस्थाबाट निकास खोज्ने महत्वपूर्ण अवसरका रूपमा व्याख्या गरे ।

राष्ट्रपतिले निर्वाचनलाई केवल प्रतिनिधि छनोट गर्ने संवैधानिक प्रक्रिया मात्र नभई संघीय लोकतान्त्रिक गणतन्त्रलाई थप मजबुत, विश्वसनीय र प्रभावकारी बनाउने ऐतिहासिक अवसरका रूपमा चित्रण गरे । लोकतन्त्रको यात्रालाई संस्थागत गर्दै नयाँ ऊर्जा दिने विश्वास उनले व्यक्त गरे ।

उनले विगतका संघर्ष, बलिदान र सहिदहरूको सपनालाई साकार पार्ने माध्यम पनि यही निर्वाचन हुने उल्लेख गरे । सुशासन, पारदर्शिता र जवाफदेहिताको अपेक्षा राखेका नवयुवाहरूको चाहनालाई सम्बोधन गर्न सबै नागरिकले जिम्मेवार ढंगले मतदान प्रक्रियामा सहभागी हुनुपर्नेमा उनले जोड दिए ।

लोकतान्त्रिक अभ्यासलाई अझ परिपक्व र विश्वसनीय बनाउन निर्वाचनमार्फत जनमत अभिव्यक्त गर्नु अपरिहार्य रहेको राष्ट्रपतिले आफ्नो सम्बोधनमा स्पष्ट पारे ।

यस्तो छ राष्ट्रपति पौडेलले राष्ट्रका नाममा गरेको सम्बोधनः

आदरणीय दाजुभाइ तथा दिदीबहिनीहरू,

यही फागुन २१ गते सम्पन्न हुन गइरहेको प्रतिनिधि सभा सदस्यको निर्वाचन हाम्रो राजनीतिक इतिहासको एक जटिल परिस्थितिको निकासका रुपमा हुन गइरहेको छ । यो निर्वाचन केवल प्रतिनिधि चयन गर्ने संवैधानिक प्रक्रिया मात्र होइन, यो सङ्घीय लोकतान्त्रिक गणतन्त्रको यात्रालाई अझ व्यापक, विश्वसनीय र सुदृढ बनाउने ऐतिहासिक अवसर पनि हो ।

देशले विगतका केही वर्षहरूमा महत्त्वपूर्ण उपलब्धिहरू हासिल गरेको छ । लामो सङ्घर्ष र त्यागपछि हामीले लोकतान्त्रिक गणतन्त्रको स्थापना गरेका छौँ । सबैलाई थाहा छ, आज नयाँ संविधानमार्फत समावेशी राज्य संरचना सुनिश्चित भएको छ ।

हामीले सङ्घीय शासन प्रणालीलाई संस्थागत गर्दै प्रदेश र स्थानीय तहसम्म अधिकार प्रत्यायोजन गरेका छौँ । सामाजिक सुरक्षा कार्यक्रम विस्तार गर्दै ज्येष्ठ नागरिक, अपाङ्गता भएका व्यक्तिहरू, दलित, महिला तथा विपन्न समुदायको अधिकारलाई मजबुत बनाउने प्रयास सुरु भएका छन् ।

पछिल्लो दशकमा शिक्षा, स्वास्थ्य, सडक, ऊर्जा र सञ्चार पूर्वाधारमा देश उल्लेख्य प्रगतिका साथ अगाडि बढिरहेको छ । जगजाहेर छ कि, यी उपलब्धिहरू सहजै प्राप्त भएका होइनन्, यी जनताको बलिदान र अटुट विश्वासको साथै उनीहरूको सक्रिय सहभागिताको परिणाम हुन् ।

यद्यपि, हामीले सुशासन, सामाजिक न्याय, उत्तरदायी शासन र सेवा प्रवाहका क्षेत्रमा अझै काम गनुपर्नेछ । मलाई विश्वास छ, आगामी निर्वाचनले त्यही भावधारालाई संस्थागत गर्दै लोकतन्त्रलाई नयाँ ऊर्जा प्रदान गर्नेछ ।

यो निर्वाचनले निरङ्कुशताविरुद्ध लामो संघर्ष र बलिदान गरेको अघिल्ला पुस्ता र त्यसमा आफ्नो जीवन बलिदान गर्ने सहिदहरूको सपना, नवयुवाहरूको सुशासनको माग, पारदर्शिता र जवाफदेहिताप्रतिको अपेक्षा पूरा गर्नेछ । र, हाम्रो लोकतान्त्रिक अभ्यासलाई अझ विश्वस्त र परिपक्व बनाउनेछ ।

यो निर्वाचनले विकास, समृद्धि, सामाजिक न्याय र उन्नतिको यात्रालाई नवीन ढङ्गले परिभाषित गर्ने छ र नयाँ उचाइमा पुर्‍याउने छ भन्नेमा म विश्वस्त छु ।

यो निर्वाचन हाम्रा लागि पछिल्ला उपलब्धिहरूको रक्षा र प्रवर्द्धन गर्दै नयाँ सम्भावनातर्फ अघि बढ्ने युगीन आवश्यकता हो । त्यसैले यो निर्वाचनलाई सफल बनाउनु हाम्रो साझा काम र ऐतिहासिक दायित्व पनि हो‍ ।

म सबै राजनीतिक दल, उम्मेदवार, नागरिक समाज, सञ्चारमाध्यम र सम्बन्धित निकायहरूलाई निर्वाचन प्रक्रियालाई शान्तिपूर्ण, स्वतन्त्र, निष्पक्ष र भयरहित वातावरणमा सम्पन्न गर्न पूर्ण प्रतिबद्ध रहन आग्रह गर्दछु ।

मतभिन्नता स्वाभाविक हो, तर सहिष्णुता, मर्यादा र विधिको शासनप्रति सम्मान हाम्रो साझा मूल्य हुनुपर्छ । आउनुहोस्, हामी सबै मिलेर लोकतन्त्रको रक्षा, सामाजिक न्यायको प्रवर्द्धन र विकासको यात्रालाई अझ सुदृढ बनाउने सङ्कल्पका साथ यस ऐतिहासिक निर्वाचनमा सहभागी बनौँ ।

जय नेपाल !