काठमाडौंबाट पोल्थली जाँदै गरेको बस दुर्घटना, चार जनाको मृत्यु

काठमाडौं । काठमाडौंबाट ओखलढुंगाको खिजीदेम्बा वडा नंं. २ को पोल्थली रगनीतर्फ जाँदै गरेको बस सेलेघाटमा दुर्घटना भएको छ । दुर्घटनामा कम्तीमा चार जनाको मृत्यु भएको प्रहरीले जनाएको छ ।

प्रहरीका अनुसार अरनिको यातायातको बा.५ ख ९९७५ नम्बरको बस खुर्कोटबाट करिब तीन किलोमिटर अगाडि मन्थलीतर्फको सडक खण्ड अन्तर्गत लिलौती पहराबाट तामाकोसी नदीमा खसेको हो । दुर्घटना मन्थली नगरपालिका क्षेत्रभित्र भएको जनाइएको छ ।

जिल्ला प्रहरी कार्यालय रामेछापका सूचना अधिकारी इन्सपेक्टर राजन अधिकारीका अनुसार बस पहराबाट खसेर नदीमा डुबेको अवस्थामा भेटिएको छ । हालसम्म ६ जना घाइतेको उद्धार गरी उपचारका लागि अस्पताल पठाइएको छ भने घटनास्थलबाट चार जनाको शव फेला परेको उनले जानकारी दिए । प्रारम्भिक जानकारीअनुसार बसमा १३ जना यात्रु सवार रहेका थिए ।

दुर्घटनापछि केही यात्रु पौडिएर बाहिर निस्कन सफल भएका छन् । यद्यपि बससँगै नदीमा कति यात्रु डुबेका छन् भन्ने यकिन भइसकेको छैन ।

प्रहरी र स्थानीयवासीको सहयोगमा उद्धार कार्य जारी रहेको छ । केही घाइतेलाई डुंगाको सहायताबाट नदीबाट निकालिएको प्रहरीले जनाएको छ । घटनाबारे थप विवरण आउन बाँकी छ ।