सुकिला नोट वितरण सुरु, असोज १० गतेसम्म सटही गर्न सकिने

काठमाडौं । नेपाल राष्ट्र बैंकले आइतबारदेखि सुकिला नोट वितरण सुरु गरेको छ । राष्ट्र बैंकले भदौ २९ गतेदेखि असोज १० गतेसम्म सुकिला नोट सटही गर्ने व्यवस्था मिलाएको हो ।

यसअघि राजनीतिक सङ्क्रमणका कारण नोट वितरण हुन्छ कि हुँदैन भन्ने अन्योल रहेको थियो । तर, राष्ट्र बैंक तथा वाणिज्य बैंकहरूको भौतिक संरचना ठूलो क्षति नपाएकोले तोकिएको समयमै नोट वितरण गर्न सकिने अवस्था रहेको राष्ट्र बैंकका प्रवक्ता किरण पण्डितले जानकारी दिए ।

साना दरका नोट सटहीका लागि काठमाडौंको थापाथलीस्थित मुद्रा व्यवस्थापन विभागका साथै प्रदेशका कार्यालयहरू विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीमा व्यवस्था मिलाइएको छ । साथै, विभिन्न बैंक तथा वित्तीय संस्थाका शाखाहरूबाट पनि नोट सटही गर्न सकिने छ ।

यसपालि पाँच रुपैयाँ दरको नोट नयाँ वितरण हुनेछ । ग्राहकले आफ्नो खाता रहेको बैंक, नजिकको वित्तीय संस्था वा नेपाल राष्ट्र बैंकमा गई सुकिला नोट सटही गर्न सक्नेछन् ।

राष्ट्र बैंकले अघिल्लो वर्षदेखि नयाँ नोटको सट्टा सुकिला नोट बाँड्न थालेको हो । यसरी सुकिला नोट बाँड्दा वार्षिक करिब १ अर्ब ३० करोड रुपैयाँ बचत हुने अनुमान गरिएको छ ।