कार्की अन्तरिम सरकार प्रमुख नियुक्त, देशले पायो पहिलो महिला कार्यकारी नेतृत्व

काठमाडौं । नेपालले आफ्नो इतिहासमा पहिलो पटक महिलाको कार्यकारी नेतृत्व पाएको छ । पूर्वप्रधानन्यायाधीश सुशीला कार्कीलाई अन्तरिम सरकारको प्रमुख बनाउने सहमतिसँगै देशको नेतृत्व महिलाको हातमा गएको हो ।

शुक्रबार साँझ राष्ट्रपति कार्यालयमा भएको सहमतिपछि कार्कीले केहीबेरमै शपथ लिने तय भएको छ । कार्की यसअघि पनि नेपालको पहिलो महिला प्रधानन्यायाधीश बनेर इतिहास रचिसकेकी छिन् ।

अवकाशको करिब आठ वर्षपछि उनी फेरि उच्च जिम्मेवारीमा फर्किएकी हुन् । यसपटक देशको कार्यकारी प्रमुखका रूपमा उनले नयाँ इतिहास रचेकी छन् ।

न्यायपालिकामा हुदाँ हक्की, निडर र इमानदार स्वभावकी रूपमा चर्चामा आएकी कार्कीलाई मुलुक संकटमा रहेका बेला नेतृत्वको जिम्मेवारी दिइएको हो ।

सामाजिक सञ्जाल बन्दको विरोधमा जेनजी पुस्ता सडकमा उत्रिएपछि उत्पन्न सङ्कटले देशका तीनवटै शक्ति (कार्यपालिका, न्यायपालिका र व्यवस्थापिका) प्रभावित भएका थिए । यसैबीच तत्कालीन प्रधानमन्त्री केपी शर्मा ओलीले राजीनामा दिएका थिए ।

प्रधानमन्त्रीको राजीनामापछि राष्ट्रपति रामचन्द्र पौडेलले सेना प्रमुख लगायत सरोकारवालाहरूसँग परामर्श गरी अन्तरिम सरकारको नेतृत्व कार्कीलाई सुम्पने सहमति जुटाएका हुन् ।

अहिलेको संक्रमणकालीन अवस्थामा कार्कीको नेतृत्वमा बन्ने सरकारले मुलुकलाई स्थायित्वतर्फ डोर्याउने र आगामी निर्वाचनपछि निर्वाचित जनप्रतिनिधिलाई सत्ता हस्तान्तरण गर्ने लक्ष्य राखिएको छ ।