एमालेको दोस्रो विधान महाधिवेशन आजदेखि, गोदावरीस्थित सनराइज सभा हलमा उद्घाटन

ललितपुर । सत्तारुढ नेकपा (एमाले) को दोस्रो विधान महाधिवेशन आज (शुक्रबार) बिहान ११ बजेबाट सुरु हुँदैछ । गोदावरीस्थित सनराइज सभा हलमा पार्टी अध्यक्ष तथा प्रधानमन्त्री केपी शर्मा ओलीले औपचारिक उद्घाटन गर्ने कार्यक्रम तय गरिएको छ ।

पार्टी केन्द्रीय कार्यालयका सचिव डा. भीष्मराज अधिकारीका अनुसार महाधिवेशनमा २,०२६ प्रतिनिधि र ३१५ आयोजक गरी कुल २,३४१ जना सहभागी हुनेछन् ।

एमालेले यसपटक परम्परागत शैली तोड्दै उद्घाटन, स्वागत र शुभकामना मन्तव्यजस्ता कार्यक्रम नगर्ने जनाएको छ । उद्घाटन समारोह जम्मा १२ मिनेटमै सकिनेछ ।
मङ्गल धुन, सहिद सम्झनामा शोक धुन, राष्ट्रिय धुन, अन्तर्राष्ट्रिय कम्युनिस्ट गीत बजाइने छ । सभा हलभित्र धुनहरू बजिरहँदा बाहिर मिडिया सेन्टरमा कलाकारहरूले आर्ट निर्माण गर्नेछन्, जसको लाइभ प्रस्तुति हलभित्र देखाइनेछ ।

महाधिवेशनको नारा ‘निर्णायक राष्ट्रिय शक्ति निर्माण हाम्रो सङ्कल्प, समृद्ध नेपाल सुखी नेपाली राष्ट्रिय गन्तव्य’ रहेको छ । एमाले केन्द्रीय कार्यालयका सचिव डा।भीष्मराज अधिकारीअनुसार सभा हलको सीट संख्या २८ सय ४० रहेको छ ।

महाधिवेशन हलभित्र छिर्ने ४ वटा प्रवेश द्वार बनाइएका छन् । पहिलो द्वारबाट ओलीको मात्रै प्रवेश हुनेछ । अन्य पदाधिकारी, मन्त्री, मुख्यमन्त्री सबै दोस्रो र तेस्रो प्रवेशद्वारबाट प्रतिनिधिसँगै प्रवेश गर्नेछन् ।

परिचय स्क्यान गर्ने ६ वटा कम्प्युटरका बुथ छन् । त्यही बुथबाट प्रतिनिधि, पर्यवेक्षक, स्वयंसेवकहरुले प्रवेश पाउने छन् । अन्तिम प्रवेशद्वारबाट क्याटरिङ्गका लागि खाद्यन्न, खाने पानी ढुवानीका लागि खुला गरिएको छ । दोस्रो र तेस्रो प्रवेश द्वारबाट महाधिवेशन हल छिर्नासाथ ओलीको पूर्ण कदको तस्बिर र विधान महाधिवेशनको लोगो राखिएको छ । हलभित्र २२ सय स्क्वार फिट डिजिटल बोर्ड राखिएको छ ।

सभा हलको पर्खालसँगै मिडिया सेन्टरको व्यवस्था गरिएको छ। प्रतिनिधि, पर्यवेक्षकको परिचयपत्र मूल गेटमा मात्रै होइन हलभित्र पस्दा पुनः स्क्यान गरिन्छ ।

मञ्चमा १८ जना पदाधिकारीहरू मात्रै बस्ने व्यवस्था गरिनेछ । मञ्चमा दुई खण्ड बनाइएको छ । अघिल्लो खण्डमा अध्यक्ष ओली बस्नेछन् भने अन्य पदाधिकारी पछिल्लो खण्डमा मर्यादाअनुसार बस्ने व्यवस्था मिलाइएको छ ।

महाधिवेशनमा अध्यक्ष ओलीले राजनीतिक प्रतिवेदन पेस गर्नेछन् । त्यसलगत्तै पार्टीका उपाध्यक्ष विष्णुप्रसाद पौडेलद्वारा विधान संशोधन सम्बन्धी प्रस्ताव र महासचिव शंकर पोखरेलद्वारा संगठनात्मक प्रतिवेदन प्रस्तुत गर्ने कार्यसूची रहेको छ ।