फेसबुकसहित सामाजिक सञ्जाल दर्ताका लागि आज अन्तिम दिन

काठमाडौं । सरकारले सामाजिक सञ्जाललाई अनिवार्य दर्ताका लागि दिएको समयसीमा आज बेलुकी १२ः०० बजे समाप्त हुँदैछ । भदौ १२ गते सार्वजनिक सूचना जारी गर्दै सरकारले नेपालमा सञ्चालनमा रहेका र नेपाल प्रवेशको तयारीमा रहेका सबै सामाजिक सञ्जाललाई सात दिनभित्र सूचीकरण गर्नुपर्ने निर्देशन दिएको थियो ।

दर्ता नभए बन्द गर्ने चेतावनी
मन्त्रिपरिषद्को निर्णयअनुसार दर्ता हुन नआए सामाजिक सञ्जाललाई नेपालमा बन्द गरिने चेतावनी सरकारले दिएको छ । सञ्चार तथा सूचना प्रविधि मन्त्रालयका प्रवक्ता गजेन्द्रकुमार ठाकुरका अनुसार दिउँसो पौने ४ बजेसम्म कुनै पनि सामाजिक सञ्जाल सूचीकरणका लागि सम्पर्कमा आएको छैन ।

“राति १२ बजेसम्म समय बाँकी छ । यदि इमेलमार्फत जानकारी पठाए भने बन्द हुँदैन, नत्र सर्वोच्चको आदेशअनुसार मन्त्रिपरिषद्को निर्णय कार्यान्वयन हुन्छ,” ठाकुरले भने ।

अघिल्ला निर्णय र अनुभव
यसअघि सरकारले टेलिग्रामलाई निष्क्रिय बनाइसकेको थियो । सोभन्दा अघि टिकटकलाई पनि बन्द गरिएको थियो । तर टिकटकले नेपालमा सूचीकरण गरेपछि हाल पुनः सञ्चालनमा आएको छ ।

लक्षित सञ्जालहरू
फेसबुक, ट्विटर, ह्वाट्सएप, इन्ट्राग्रामलगायत प्रमुख सामाजिक सञ्जाललाई नेपालमा अनिवार्य सूचीकरण गर्न भनिएको हो । सरकारका अनुसार पटक–पटक पत्र पठाउँदा अटेर गरेपछि यसपटक मन्त्रिपरिषद्ले कडा निर्णय लिएको हो ।

मन्त्रिपरिषद्को निर्णय
गत बुधबार मन्त्रीपरिषद्का प्रवक्ता पृथ्वीसुब्बा गुरुङले सामाजिक सञ्जालको प्रयोगलाई व्यवस्थित गर्न ‘सामाजिक सञ्जालको प्रयोग व्यवस्थित गर्ने निर्देशिका २०८०’ र सर्वोच्च अदालतको आदेशबमोजिम सात दिनभित्र सूचीकरण गर्न आह्वान गरिएको जानकारी दिएका थिए । उनका अनुसार तोकिएको अवधिमा सम्पर्कमा नआउने वा सूचीकरण नगर्ने सञ्जाललाई क्रमशः नेपालभित्र निष्क्रिय गराइनेछ ।