भदौ १६ः इराकमा १२ नेपालीको विभत्स हत्या भएको त्यो कालो दिन

काठमाडौं । आज भदौ १६ गते, इराकमा आतंकवादी आक्रमणमा परी १२ जना नेपालीले ज्यान गुमाएको दिन स्मरण गरिँदैछ । वैदेशिक रोजगारीका लागि इराक पुगेका ती नेपालीको विभत्स हत्या भएको आज २१ वर्ष पूरा भएको छ ।

२०६१ साल भदौ ४ गते खाना पकाउने र सरसफाइको कामका लागि जोर्डन हुँदै इराक प्रवेश गरेका उनीहरूलाई आतंकवादी संगठन अन्सर अल सुन्नाले अपहरण गरेको थियो । अपहरणमा परेका नेपालीले जीवनरक्षाका लागि नेपाल सरकारसँग अपिल गरेको भिडियोसमेत सार्वजनिक भएको थियो ।

नेपाल सरकारले इराकी सरकारमार्फत निरन्तर पहल गरे पनि भदौ १५ गते साँझ अन्सर अल सुन्नाले १२ नेपालीको टाउको काटी र गोली हानी हत्या गर्यो । केहीबेरमै उनीहरूको मृत शरीर देखाइएको भिडियो सार्वजनिक भयो, जसले नेपालभर त्रासदी र आक्रोश फैलायो ।

भदौ १६ गते काठमाडौं उपत्यका स्वतःस्फूर्त आन्दोलनले भरियो । सर्वसाधारणले सरकारप्रति असन्तुष्टि जनाए र वैदेशिक रोजगारी पठाउने म्यानपावर कम्पनीमाथि आक्रोश उतारे । त्यतिबेला राजधानीका धेरै म्यानपावर कार्यालयमा तोडफोड भयो भने सञ्चारगृह र धार्मिक प्रतिष्ठान समेत आक्रमणको निशाना बने ।

आन्दोलन तीव्र बन्दै जाँदा मुस्लिम समुदायका पवित्र स्थलदेखि व्यापारी र सर्वसाधारण व्यक्तिसमेत हिंसाको शिकार भए । त्यतिबेला कान्तिपुर दैनिक र स्पेसटाइम दैनिकमाथि पनि आक्रमण भएको थियो, जसपछि स्पेसटाइम दैनिक स्थायी रूपमा बन्द भएको थियो ।

वैदेशिक रोजगारीमा बाध्य भएर विदेशिएका निर्दोष नेपालीले भोगेको उक्त विभत्स घटना आज पनि पीडादायी स्मृतिका रूपमा बाँकी छ । भदौ १६, २०६१ को त्यो दिन नेपाली इतिहासकै कहिल्यै नबिर्सिने कालो दिन बनेको छ ।