सिन्धुपाल्चोकमा फार्ममा आगलागीः ५० बाख्रा मरे, एक व्यक्ति घाइते

सिन्धुपाल्चोक । चौतारा साँगाचोकगढी नगरपालिका–१ गुन्सास्थित विदान विधि कृषि पशुपन्छी फार्ममा करेन्ट सर्ट भएर आगलागी हुँदा ठूलो क्षति भएको छ । बिहान करिब साढे ८ बजे भएको आगलागीमा ५० बाख्रा जलेर मरेका छन् ।

जिल्ला प्रहरी कार्यालय सिन्धुपाल्चोकका प्रहरी प्रमुख एसपी रामेश्वर कार्कीका अनुसार विमला श्रेष्ठको नाममा दर्ता गरिएको उक्त फार्ममा कुल ८५ बाख्रा थिए । तीमध्ये ५० वटा जलेर मरेका, ६ वटा घाइते भएका र २९ वटा सुरक्षित उद्धार गरिएको प्रहरीले जनाएको छ ।

आगो निभाउने क्रममा स्थानीय ४४ वर्षीय चुडामणी श्रेष्ठ घाइते भएका छन् । उनको टाउको र हातमा चोट लागेकाले चौतारा अस्पतालमा उपचार भइरहेको छ ।

स्थानीयवासी र प्रहरीको सहयोगमा आगो पूर्ण नियन्त्रणमा आएको प्रहरीको भनाइ छ ।