देशभर मनसुन सक्रिय, सुदूरपश्चिममा मुसलधारे वर्षाको उच्च जोखिम

काठमाडौं । मनसुनको न्यून चापीय रेखा अहिले तराई नजिक भएकाले आगामी २४ घण्टासम्म मनसुन सक्रिय रहने जल तथा मौसम विज्ञान विभागको पूर्वानुमान महाशाखाले जनाएको छ । आज दिउँसो देशका अधिकांश भूभागमा आकाश पूर्ण रूपमा बादलले ढाकिनेछ ।

मधेस प्रदेशसहित कोशी, वाग्मती, गण्डकी, लुम्बिनी र सुदूरपश्चिमका थुप्रै स्थानमा मध्यम वर्षा हुने सम्भावना छ । यीमध्ये केही स्थानमा भारी वर्षा र छिटफुट क्षेत्रमा मुसलधारे वर्षा पर्न सक्ने विभागको अनुमान छ । कर्णाली प्रदेशका एक(दुई स्थानमा पनि भारी वर्षाको पूर्वानुमान गरिएको छ ।

आज राति गण्डकी, लुम्बिनी, कर्णाली र सुदूरपश्चिमका पहाडी भूभागमा आकाश पूर्ण रूपमा बादलमय रहनेछ भने अन्य भागमा आंशिकदेखि सामान्य बादल रहनेछ । गण्डकी र कर्णालीका पहाडी इलाकासहित लुम्बिनी र सुदूरपश्चिमका पहाडी तथा तराईका धेरै स्थानमा मध्यम वर्षा पर्न सक्ने सम्भावना छ ।

विशेषगरी सुदूरपश्चिमका पहाडी तथा तराईका केही क्षेत्रमा अत्यधिक वर्षा पर्न सक्ने खतरा छ । लुम्बिनीको तराई, गण्डकी र कर्णालीका पहाडी भागका एक–दुई स्थानमा पनि भारी वर्षा हुने अनुमान गरिएको छ ।