उधारो सेयर कारोबारमा रोक लगाउँदै धितोपत्र बोर्ड

काठमाडौं । नेपाल धितोपत्र बोर्डले चालु आर्थिक वर्ष २०८२/८३ का लागि सार्वजनिक गरेको नीति तथा कार्यक्रममार्फत उधारोमा सेयर कारोबारमा कडाइ गर्ने भएको छ ।

हाल अनलाइनमार्फत सेयर खरिद गर्दा लगानीकर्ताले कुल खरिद मूल्यको २५ प्रतिशत रकम जम्मा गरेपछि मात्रै आदेश दिन मिल्छ । तर, भौतिक रूपमा वा फोनमार्फत अर्डर दिने लगानीकर्ताले भने कुनै रकम नजम्क्याईकन पनि सेयर किन्ने आदेश गर्न सक्छन् ।

यद्यपि कारोबार सम्पन्न भएपछि दुई दिनभित्र आवश्यक रकम भुक्तानी गर्नु अनिवार्य छ । व्यवहारमा भने ब्रोकरहरूसँग राम्रो सम्बन्ध भएका केही लगानीकर्ताहरूले तोकिएको समयमै रकम तिर्न आलटाल गर्ने गरेका छन् । यस्तो अवस्थामा ब्रोकरले उनीहरूको तर्फबाट अस्थायी रूपमा रकम तिर्दिने गरेका छन्, किनभने निर्धारित समयमा भुक्तानी नहुँदा सेटलमेन्ट प्रक्रियामा समस्या आउन सक्छ ।

अब भने, बोर्डले स्पष्ट व्यवस्था गर्ने तयारी गरेको छ— लगानीकर्ताले कारोबार गर्न चाहेको खाता (बैंक खाता वा ट्रेडिङ खाता) मा पर्याप्त रकम लोड नगरेसम्म सेयर खरिद आदेश निष्पादन नहुने । यसले उधारो कारोबार प्रणालीमा रोक लगाउने उद्देश्य राखेको छ ।