केन्द्रीय सर्भर स्थानान्तरणका कारण सोलुखुम्बु नापी कार्यालयको सेवा अस्थायी रूपमा बन्द

ओखलढुंगा । सोलुखुम्बु जिल्ला नापी कार्यालयले केही दिनका लागि आफ्नो नियमित सेवा स्थगित हुने जानकारी दिएको छ । एक सार्वजनिक सूचनामार्फत कार्यालयले आगामी असार २० गते शुक्रबार दिउँसो १२ बजेबाट असार २२ गते आइतबार बिहान १० बजेसम्म सेवा बन्द रहने जनाएको हो ।

कार्यालयका अनुसार नक्सा प्रिन्ट, कित्ताकाट जस्ता कार्यहरूका लागि प्रयोग हुँदै आएको ‘नेलिस (NELIS)’ प्रणालीलाई केन्द्रीय सर्भरमा स्थानान्तरण गर्नु पर्ने भएकोले उक्त अवधि अवधिभर सेवा अवरुद्ध रहनेछ ।

कार्यालय प्रमुख इञ्जिनियर प्रमोद गुरागाईंको हस्ताक्षर रहेको सूचनामा सेवा स्थगनका कारण असुविधा भोग्न सक्ने सेवाग्राहीहरूलाई माफी माग्दै, आवश्यक जानकारीका लागि कार्यालयको सम्पर्कमा रहन आग्रह गरिएको छ ।

उक्त प्रणाली स्थानान्तरण कार्य सम्पन्न भएपछि पुनः सबै सेवा सुचारु गरिने र स्थायित्व तथा कार्यदक्षता बढ्ने अपेक्षा गरिएको छ । सेवाग्राहीहरूले असार २२ गते बिहान १० बजेपछि मात्र सेवा लिन जान अनुरोध गरिएको छ ।