१० दिनपछि सुरुङबाट दुई जनाको जीवितै उद्धार

काठमाडौं । त्रिशूली–३ ‘ए’ जलविद्युत आयोजनाको सुरुङभित्र १० दिनदेखि फसेका दुई श्रमिकको जीवितै उद्धार गरिएको छ । नेपाली सेनाको उद्धार टोलीले लामो प्रयासपछि सञ्जय साह र कविर महर्जनलाई सकुशल बाहिर निकालेको हो ।

सुरुङभित्र फसेका उनीहरूसँग उद्धार टोलीले यसअघि दोहोरो संवाद गर्न सफल भएको थियो । उनीहरू जीवित रहेको पुष्टि भएपछि सेनाको टोलीले उद्धार अभियानलाई थप तीव्र बनाएको थियो ।

लामो समयपछि उद्धार गरिएका दुवै जनालाई आवश्यक स्वास्थ्य परीक्षण तथा उपचारका लागि काठमाडौं ल्याउने तयारी भइरहेको छ । उनीहरूको स्वास्थ्य अवस्थाबारे थप विवरण आउन बाँकी छ ।