होर्मुज जलघाँटी अनिश्चितकालका लागि बन्द गर्ने इरानको घोषणा

काठमाडौं । इरानको इस्लामिक रिभोलुसनरी गार्ड कोर्प्स (आईआरजीसी) ले होर्मुज जलघाँटी अर्को सूचना जारी नभएसम्मका लागि बन्द गरिएको घोषणा गरेको छ । आईआरजीसीले अनधिकृत मार्गबाट जलघाँटी पार गर्ने प्रयास भएको भन्दै चेतावनीस्वरूप एक जहाजमाथि गोली चलाएपछि यस्तो निर्णय गरिएको जनाएको हो ।

स्थानीय समयअनुसार आइतबार बिहान आईआरजीसीको नौसैनिक शाखाले जारी गरेको विज्ञप्तिमा विदेशी शक्तिहरूको हस्तक्षेपले क्षेत्रीय सुरक्षा अवस्था थप जटिल बनेको आरोप लगाइएको छ । उक्त विज्ञप्ति आईआरजीसीसँग निकट मानिने अर्धसरकारी तस्निम समाचार एजेन्सीको अरबी संस्करणले सार्वजनिक गरेको हो ।

आईआरजीसीका अनुसार केही जहाजहरूले निर्धारित समुद्री मार्गको सट्टा अनधिकृत बाटो प्रयोग गरी जलघाँटी पार गर्न खोजेका थिए । तीमध्ये एक जहाजलाई रोक्न चेतावनीस्वरूप गोली चलाइएको बताइएको छ ।

विज्ञप्तिमा बाह्य शक्तिहरूको गैरकानुनी हस्तक्षेपका कारण सुरक्षा जोखिम बढेको उल्लेख गर्दै अमेरिकाको क्षेत्रीय हस्तक्षेप अन्त्य नभएसम्म कुनै पनि जहाज वा नौसैनिक साधनलाई होर्मुज जलघाँटी पार गर्न अनुमति नदिइने स्पष्ट पारिएको छ ।

यसबीच, अमेरिकी राष्ट्रपति डोनाल्ड ट्रम्पले शुक्रबार अमेरिका–इरानबीच युद्धविरामसम्बन्धी वार्ता जारी रहने संकेत दिएका थिए । उनले युद्धविराम कायम रहँदा पनि आवश्यक परे इरानविरुद्ध सैन्य कारबाही जारी राख्दै कूटनीतिक वार्तालाई अघि बढाउन सकिने धारणा व्यक्त गरेका थिए ।