आजबाट एसईई, एक महिनामै नतिजा ल्याउने लक्ष्य

काठमाडौं । नेपालभर आजदेखि माध्यमिक शिक्षा परीक्षा (एसईई) एकैसाथ सुरु हुँदैछ । पहिलो दिन अनिवार्य अङ्ग्रेजी विषयको परीक्षा सञ्चालन हुँदैछ । यस वर्षको परीक्षालाई अझ व्यवस्थित, प्रविधिमैत्री र नतिजामुखी बनाउन राष्ट्रिय परीक्षा बोर्डले विशेष रणनीति लागू गरेको जनाएको छ ।

यस पटकको परीक्षामा देशभर तथा वैदेशिक केन्द्रसहित ५ लाख १२ हजारभन्दा बढी विद्यार्थी सहभागी भएका छन् । बोर्डले उत्तरपुस्तिका परीक्षण प्रणालीमा सुधार गर्दै ‘विकेन्द्रीकरण’ अभ्यासमा ल्याएको छ, जसले नतिजा प्रकाशनलाई तीव्र बनाउने अपेक्षा गरिएको छ । सरकारको योजना अनुसार परीक्षा सम्पन्न भएको एक महिनाभित्रै नतिजा सार्वजनिक गरिने लक्ष्य राखिएको छ ।

शिक्षा, विज्ञान तथा प्रविधि मन्त्री सस्मित पोखरेलले पदभार सम्हालेसँगै शिक्षा क्षेत्रमा सुधारका कदम चाल्दै एसईई नतिजा छिटो प्रकाशन गर्न निर्देशन दिएका थिए । ढिलो नतिजाका कारण विद्यार्थीको शैक्षिक क्यालेन्डर प्रभावित हुनुका साथै मानसिक तनाव बढ्ने समस्या देखिएकाले यस्तो निर्णय गरिएको बताइएको छ ।

यसअघि एक प्रदेशको उत्तरपुस्तिका अर्को प्रदेशमा पठाएर परीक्षण गर्ने प्रचलन रहेको थियो, जसले समय खर्च बढाउँथ्यो । तर अब सम्बन्धित परीक्षा केन्द्रकै आसपासमा परीक्षण केन्द्र निर्धारण गरिनेछ । यसले ओसारपसारमा लाग्ने समय घटाउने र स्थानीय शिक्षकको सहभागितामा काम छिटो सम्पन्न हुने विश्वास गरिएको छ ।

परीक्षा नियन्त्रक टुकराज अधिकारीका अनुसार आवश्यक परेमा शिक्षक अभाव वा सुरक्षाका कारण संवेदनशील देखिएका केन्द्रहरूको उत्तरपुस्तिका सुरक्षित स्थानमा सारिने व्यवस्था पनि गरिएको छ । यसले सुरक्षा र निष्पक्षतामा कुनै कमी आउन नदिने बोर्डको दाबी छ ।

यस वर्ष कुल ५ लाख १२ हजार ४ सय २१ विद्यार्थीले परीक्षा फारम भरेका छन्, जसमा छात्राको संख्या छात्रभन्दा बढी रहेको छ । साथै, ७ जना अन्य लिङ्गी विद्यार्थीहरू पनि सहभागी छन् । महिला शिक्षामा बढ्दो पहुँचलाई यसले सकारात्मक संकेत दिएको बताइएको छ ।

वैदेशिक रूपमा जापानस्थित एभरेस्ट स्कुलबाट २३ जना विद्यार्थी परीक्षा दिनेछन् । नेपाल र जापानको समय फरकलाई ध्यानमा राख्दै परीक्षा सञ्चालन गरिएको छ । यस वर्ष कुल १ हजार ९ सय ६६ परीक्षा केन्द्रहरू निर्धारण गरिएका छन् ।