निर्वाचन नजिकिँदै जाँदा आचारसंहितामा कडाइ, सबै तहका निकायलाई आयोगको चेतावनी

काठमाडौं । यही फागुन २१ गते हुने प्रतिनिधिसभा सदस्य निर्वाचनलाई लक्षित गर्दै निर्वाचन आयोगले आचारसंहिताको पालनामा कडाइ गरेको जनाएको छ । पछिल्ला दिनमा आचारसंहिता उल्लङ्घनका घटना सार्वजनिक हुनुका साथै उल्लेख्य सङ्ख्यामा उजुरी परेपछि आयोगले सम्बन्धित सबै पक्षलाई सचेत गराएको हो ।

आयोगका अनुसार नेपाल सरकार, प्रदेश सरकार तथा दुवै तहका मन्त्रीहरूलाई पूर्ण रूपमा निर्वाचन आचारसंहिता लागू हुनेछ । त्यस्तै, संघीय, प्रदेश र स्थानीय तहअन्तर्गतका सरकारी निकाय, तिनका पदाधिकारी तथा कर्मचारीहरू पनि आचारसंहिताको दायराभित्र पर्नेछन् ।

स्थानीय कार्यपालिका र तिनका सदस्य, सरकारी, अर्धसरकारी तथा सार्वजनिक संस्थाका कार्यालय र कर्मचारीलाई समेत आचारसंहिता अनिवार्य रूपमा पालना गर्न आयोगले निर्देशन दिएको छ ।

सञ्चार प्रतिष्ठान, सञ्चारकर्मी, विद्यालय, महाविद्यालय र विश्वविद्यालय तथा तिनका शिक्षक–कर्मचारीलाई पनि आचारसंहिताको दायरामा राखिएको छ । यसैगरी राजनीतिक दल, भ्रातृ संगठन, उम्मेदवार, निर्वाचन प्रतिनिधि, मतदान प्रतिनिधि र मतगणना प्रतिनिधिलाई पनि कडाइका साथ आचारसंहिता लागू हुने जनाइएको छ ।

निजी क्षेत्रतर्फ बैंक तथा वित्तीय संस्था, सहकारी, व्यापारिक तथा औद्योगिक प्रतिष्ठान, वस्तु तथा सेवा प्रदायक कम्पनी, तिनका पदाधिकारी र कर्मचारीसमेत आचारसंहिताबाट अछुतो नरहने आयोगले स्पष्ट पारेको छ । निजी तथा गैरसरकारी संस्थाका पदाधिकारी र कर्मचारीलाई पनि समान रूपमा नियम लागू हुनेछ ।

संवैधानिक निकाय, सुरक्षा निकाय, सुरक्षाकर्मी, सार्वजनिक पद धारण गरेका व्यक्ति, अनुगमन समितिका पदाधिकारी तथा अनुगमनकर्तालाई पनि निर्वाचन आचारसंहिता लागू हुने जनाइएको छ ।

यसका साथै मतदाता, पर्यवेक्षण संस्था र पर्यवेक्षक, विकास साझेदार संस्था, सरकारी तथा अर्धसरकारी परियोजना र तिनका कर्मचारी, मतदाता शिक्षा कार्यक्रम सञ्चालन गर्ने संस्था र तिनका कर्मचारीलाई समेत आचारसंहिता पालना गर्नुपर्ने आयोगको भनाइ छ ।

स्थानीय कार्यपालिकाका केही पदाधिकारी निर्वाचन आचारसंहिताविपरीत प्रचारप्रसारमा संलग्न भएको पाइएपछि आयोगले आइतबार आचारसंहिताको स्मरण गराएको थियो । सोमबार पुनः सरकारी र निजी क्षेत्रलाई लक्षित गर्दै आचारसंहिता पूर्ण रूपमा लागू हुने दोहोर्‍याउँदै कडाइका साथ पालना गर्न निर्देशन दिएको छ ।