औपचारिक कार्यक्रमबाट टाढा रहने मन्त्री पुनको घोषणा

काठमाडौं । शिक्षा, विज्ञान तथा प्रविधि मन्त्री महावीर पुनले आफूलाई कुनै पनि औपचारिक कार्यक्रममा प्रमुख अतिथिको रूपमा निमन्त्रणा नपठाउन आग्रह गरेका छन् ।

सोमबार सामाजिक सञ्जाल फेसबुकमार्फत् उनले उद्घाटन, शिलान्यास वा अन्य औपचारिक समारोहका निम्तो अस्वीकार गर्दै आफ्ना सम्पूर्ण प्रयास काममा केन्द्रित गर्ने संकेत गरेका हुन् ।

‘कृपया कसैले पनि र कहिँबाट पनि हालको म मन्त्रीलाई उद्घाटन र शिलान्यास कार्यक्रम, प्रमुख अतिथि हुने जस्ता कुनै पनि औपचारिक कार्यक्रमहरूमा निमन्त्रणा गर्दै नगर्नु होला,’ पुनले लेखेका छन् ।

उनका अनुसार उनी अनावश्यक औपचारिकताभन्दा वास्तविक काममा ध्यान केन्द्रित गर्न चाहन्छन् । पुनले हालै युनेस्कोको उज्बेकिस्तानमा भएको महासभा र ब्रिटिश काउन्सिलले नाइजेरियामा आयोजना गरेको सम्मेलनमा समेत नगएको उदाहरण दिँदै आफू केवल अत्यावश्यक र नगई नहुने कार्यहरूमा मात्र संलग्न हुने बताएका छन् ।

विदेश भ्रमणका विषयमा फैलिएका हल्लाबारे पनि उनले प्रष्ट पार्दै, “कसैले विदेशी भ्रमण गरे भने पनि त्यो अत्यावश्यक सरकारी कामकै सिलसिलामा हो, त्यसलाई ‘घुम्न गयो’ भनेर नबुझ्न आग्रह गर्दछु,” भनेका छन् ।

राष्ट्रिय आविष्कार केन्द्रका संस्थापकसमेत रहेका पुनले मन्त्री बनेपछि फरक कार्यशैली र व्यवहारिक दृष्टिकोणका कारण व्यापक ध्यान तानेका छन् ।