मधेस प्रदेश सभामा आज सभामुख निर्वाचन, दुई उम्मेदवार मैदानमा

काठमान्डु । मधेस प्रदेश सभाको सभामुख चयनका लागि आज (आइतबार) निर्वाचन हुने भएको छ । सभामुख पदका लागि दुई जना प्रदेश सभा सदस्यले उम्मेदवारी दर्ता गराएसँगै आजै मतदान प्रक्रिया अघि बढाइने प्रदेश सभा सचिवालयले जनाएको छ ।

प्रदेश सभा सचिवालयका प्रवक्ता विपिन ठाकुरका अनुसार सत्तारुढ सात दलीय गठबन्धनका तर्फबाट जसपा नेपालका रामअशिष यादव र नेकपा (एमाले) का त्रिलोकी प्रसादले सभामुख पदका लागि उम्मेदवारी दर्ता गराएका छन् । उम्मेदवारी दर्ताका लागि शनिबार बिहान ११ बजेदेखि दिउँसो ३ बजेसम्म समय तोकिएको थियो ।

जसपा नेपालका प्रमुख सचेतकसमेत रहेका रामअशिष यादवको उम्मेदवारीमा नेपाली कांग्रेसका प्रदेश सभा सदस्य वीरेन्द्रकुमार सिंह प्रस्तावक र नेकपा (माओवादी केन्द्र) का फकिरा महतो समर्थक रहेका छन् । सभामुखमा उम्मेदवारी दर्ताअघि बसेको सात दलीय गठबन्धनको बैठकले यादवलाई सर्वसम्मत रूपमा साझा उम्मेदवार बनाउने निर्णय गरेको थियो ।

उता, नेकपा (एमाले) का तर्फबाट उम्मेदवार बनेका त्रिलोकी प्रसादको प्रस्तावकमा एमालेकी प्रदेश सभा सदस्य शारदादेवी थापा र समर्थकमा जयचन्द्रप्रसाद पटेल रहेका छन् । एमाले संसदीय दलको बैठकले प्रसादलाई सभामुखका लागि आधिकारिक उम्मेदवार बनाउने निर्णय गरेको थियो ।

आज हुने निर्वाचनले मधेस प्रदेश सभाको नेतृत्व कसले सम्हाल्ने भन्ने टुंगो लाग्नेछ ।