फागुन अन्तिम सातादेखि ‘ए डिभिजन लिग’ गर्ने एन्फाको प्रस्ताव

काठमाडौं । अखिल नेपाल फुटबल संघ (एन्फा) ले सहिद स्मारक ए डिभिजन लिग फागुनको अन्तिम सातादेखि सुरु गर्ने प्रस्ताव सरकारसमक्ष पेस गरेको छ ।

खेलकुद मन्त्री बब्लु गुप्ताको संयोजनमा मन्त्रालयमा भएको छलफलमा एन्फा पदाधिकारी, ए डिभिजन क्लबका प्रतिनिधि र नेपाल फुटबल खेलाडी संघका पदाधिकारीहरू सहभागी थिए । छलफलमा मन्त्री गुप्ताले सबैको धारणा सुनेपछि लिग मिति प्रस्ताव गर्न एन्फालाई अनुरोध गरेका थिए ।

एन्फा अध्यक्ष पंकजबिक्रम नेम्बाङले १२० दिनभित्र लिग सम्पन्न गर्न सकिने बताउँदै फागुन अन्तिम साता लिग सुरु गर्ने प्रस्ताव राखेका थिए ।

यो सिजनको ए डिभिजन लिग होम एन्ड अवे प्रणालीमा नहुने भए पनि, एकभन्दा बढी मैदानमा खेलहरू गराउने योजना एन्फाले अघि सारेको छ । लिग ‘राबल राउन्ड’ ढाँचामा हुने प्रस्ताव गरिएको छ ।

अब मन्त्रालयले १४ ए डिभिजन क्लबहरूसँग छुट्टाछुट्टै परामर्श गरेर अन्तिम निर्णय लिनेछ । त्यसपछि एन्फालाई आधिकारिक निर्देशन दिने तयारी छ ।

यसअघि एन्फा र १४ क्लबबीच पुसको पहिलो सातादेखि राष्ट्रिय लिग सञ्चालन गर्ने सहमति भएको थियो । राष्ट्रिय लिगमा अघिल्लो संस्करणका शीर्ष ६ क्लब र एन्फा प्रेसिडेन्ट लिगका शीर्ष ४ टोलीसहित १० टोली सहभागी हुने तयारी थियो ।

तर, सो सहमतिको विरोधमा नेपाल फुटबल खेलाडी संघले सडक आन्दोलन थालेपछि एन्फा मुख्यालयमा धर्ना दिएको थियो । खेलाडी संघले ए डिभिजन लिग तत्काल गर्नुपर्ने माग गर्दै प्रत्यक्ष प्रसारणको व्यवस्था नभएसम्म वार्तामा नबस्ने अडान लिएको थियो ।

अब एन्फाले ए डिभिजन लिगका लागि नयाँ प्रस्ताव अघि सारेसँगै राष्ट्रिय लिग भने पछाडि धकेलिएको छ ।