एमालेको ११औँ महाधिवेशनका प्रतिनिधि सात आधारमा छनोट हुने

काठमाडौं । नेकपा (एमाले) ले आगामी मंसिर २७ देखि २९ गतेसम्म हुने ११औँ महाधिवेशनका लागि प्रतिनिधि छनोटका सात मापदण्ड तय गरेको छ । पार्टी अध्यक्ष केपी शर्मा ओलीले जारी गरेको अन्तरपार्टी निर्देशन (अपानि) मार्फत ती आधारहरू मातहतका सबै कमिटीहरूमा पठाइएका छन् ।

एमाले केन्द्रीय सचिवालयले यसअघि मंसिर १३ गते देशव्यापी रूपमा प्रतिनिधि छनोटको कार्यतालिका सार्वजनिक गरेको थियो । अध्यक्ष ओलीको हस्ताक्षरयुक्त नयाँ निर्देशन अनुसार महाधिवेशन प्रतिनिधि बन्न केन्द्रीय सङ्गठन विभागले प्रमाणित गरेको वैध सदस्यता अनिवार्य मानिनेछ । साथै, भूगोल परिवर्तन गर्न चाहने सदस्यहरूले कात्तिक मसान्तभित्र सदस्यता स्थानान्तरण पूरा गर्नुपर्ने उल्लेख छ ।

अपानिअनुसार पदेन प्रतिनिधि रहेका आयोजकहरू भने प्रतिनिधि छनोट प्रक्रियामा सहभागी हुन पाउने छैनन् । बाँकी सबै सदस्यहरूले भने तोकिएको एउटै क्लस्टरमा भाग लिएर प्रतिनिधि छनोटमा भाग लिन सक्ने व्यवस्था गरिएको छ ।

दलित र श्रमिक क्लस्टरमा रहेका सदस्यहरूको विवरण जिल्ला तथा प्रदेश कमिटीहरूले एक हप्ता अगावै सार्वजनिक गर्नुपर्नेछ । जनसंगठनमा रहने सदस्यहरूले आफ्नो नाम भूगोल वा विशेष कमिटीबाट अलग गर्नुपर्ने व्यवस्था पनि निर्देशनमा समावेश गरिएको छ ।

प्रतिनिधि छनोटका क्रममा कुनै विवाद वा अस्पष्टता देखिएमा केन्द्रीय सङ्गठन विभागसँग सम्पर्क गर्न भनिएको छ । तर विवादका नाममा तोकिएको संख्याभन्दा बढी प्रतिनिधि पठाए ती मान्य नहुने एमालेको स्पष्ट चेतावनी छ ।

पार्टी प्रचार तथा प्रकाशन विभागका प्रमुख राजेन्द्र गौतमका अनुसार, अपानि मातहतका कमिटीहरूमा पुगेपछि जिल्ला कमिटीहरूले संघीय निर्वाचन क्षेत्रका आधारमा प्रतिनिधि छनोट प्रक्रिया अघि बढाउनेछन् ।

एमालेका अनुसार, ११औँ महाधिवेशनमा केन्द्रीय सदस्य, विभिन्न निकाय, भूगोल, क्लस्टर र मनोनीत गरी जम्मा २ हजार १२७ जना प्रतिनिधि सहभागी हुनेछन् । चयन भएका प्रतिनिधिहरूले फोटोसहितको विवरण सङ्गठन विभागले तोकेको ढाँचामा भरेर केन्द्रीय कार्यालयमा बुझाउनुपर्नेछ ।