माओवादी केन्द्रसँग एकता गर्ने एकीकृत समाजवादीको निर्णय

काठमाडौं । नेकपा (एकीकृत समाजवादी) ले माओवादी केन्द्रसँग पार्टी एकता गर्ने औपचारिक निर्णय गरेको छ । शुक्रबार सम्पन्न केन्द्रीय कमिटी बैठकले नेपाल समाजवादी पार्टी (महिन्द्रराय यादव समूह) सहित एकीकरणको दिशा तय गरेको हो ।

नेता जगन्नाथ खतिवडाका अनुसार बैठकले एकता गर्ने सर्वसम्मत निर्णय गर्दै बाँकी गृहकार्य र मिल्न बाँकी विषयहरू टुंग्याउने जिम्मा सचिवालयलाई दिएको छ ।

बैठकमा माओवादी केन्द्रसँग नीति र नेतृत्वको विषयमा प्रारम्भिक सहमति भइसकेको बताइएको छ । प्रस्तावित संरचना अनुसार बहुपदीय ढाँचा नराखी, पुष्पकमल दाहाल ‘प्रचण्ड’ संयोजक र माधवकुमार नेपाल सह–संयोजक रहने तयारी भएको हो ।

नयाँ पार्टीको नाम “नेकपा (समाजवादी)” राख्ने प्रस्ताव गरिएको छ, यद्यपि नाम र चुनाव चिन्हबारे छलफल अझै जारी छ । पार्टीले मार्क्सवाद–लेनिनवादलाई मार्गदर्शक सिद्धान्त मान्दै, नेपाली विशेषताको समाजवाद र दीर्घकालीन वैज्ञानिक समाजवादको बाटो अघि बढाउने नीति लिएको बताइएको छ ।

तर, एकीकरण प्रक्रियामा सबै नेताहरू सहभागी हुने छैनन् । वरिष्ठ नेता झलनाथ खनाल, महासचिव घनश्याम भूसाल, घनेन्द्र बस्नेत, रामकुमारी झाँक्री, जीवनराम श्रेष्ठ, विजय पौडेललगायत कम्तीमा १४ जना नेताहरूले एकता प्रक्रियामा नजाने घोषणा गरिसकेका छन् ।