मुग्लिन–नारायणगढ सडकमा सात सवारी आपसमा ठोक्किँदा २१ घाइते, दुईको अवस्था गम्भीर

चितवन । नारायणगढ–मुग्लिन सडकखण्डअन्तर्गत भरतपुर महानगरपालिका–२९ स्थित गाईघाटमा शनिबार बिहान भएको बहु–सवारी दुर्घटनामा घाइते भएका २१ जना सबैको पहिचान खुलेको छ । बिहान करिब ७ बजे सातवटा सवारीसाधन आपसमा ठोक्किँदा दुर्घटना घटेको हो ।

जिल्ला प्रहरी कार्यालय चितवनका अनुसार दुई जना गम्भीर घाइते रहेका छन् । गम्भीर घाइतेमा खैरहनी नगरपालिका–स्थित जुना तामाङ र रत्ननगर नगरपालिकाकी सरु चेपाङ छन् । दुबै जनाको उपचार भरतपुरस्थित नेसनल सिटी अस्पतालमा भइरहेको छ ।

यीबाहेक तनहुँको देवघाट गाउँपालिका–५ निवासी ५२ वर्षीय युवराज साखी, शर्मिला साखी र अर्चना साखी घाइते भएका छन् । हेटौँडा उपमहानगरपालिका–७ का अजय स्याङ्तान पनि घाइते मध्येमा परेका छन् ।

नवलपरासी (बर्दघाट सुस्ता पश्चिम) का प्रकाश पाण्डे, पवित्रा पाण्डे, प्रज्ञा पाण्डे, आसुतोष पाण्डे, कलश पाण्डे, पुष्पा भण्डारी पनि घाइते छन् । चितवनको खैरहनी नगरपालिका–२ का कृपा नेपाल, केदार नेपाल, काव्य नेपाल, इस्मिरिका राना मगर र काठमाडौंकी १८ वर्षीया कला दुर्लाकोटी पनि घाइतेहरूको सूचीमा परेका छन् ।

यीमध्ये अधिकांशको उपचार नेसनल सिटी अस्पतालमा भइरहेको छ ।

बा.४ ख ७४२० नम्बरको बसमा सवार नवलपरासी, कावासोतीका श्रीराम रानाभाट, पार्वती रानाभाट, निशान रानाभाट र विपिन्सा रानाभाट घाइते भएका छन् । उनीहरूको उपचार मुग्लिनस्थित जनता केयर अस्पतालमा भइरहेको छ ।

नेसनल सिटी अस्पताल भरतपुरमा १३ जना, नयाँ मेडिकल कलेजमा ४ जना र जनता केयर अस्पताल मुग्लिनमा ४ जना गरी कुल २१ जनाको उपचार भइरहेको प्रहरीले जनाएको छ ।

ना.८ ख ६६२९ नम्बरको ट्रक मुग्लिनतर्फबाट नारायणगढ आउँदै थियो भने बा.४ ख ७४२० नम्बरको बस विपरीत दिशाबाट जाँदै गर्दा ठोक्किएका थिए ।

त्यसपछि बसका पछाडिबाट आइरहेका ना.७ ख ९६०७ नम्बरको टेलर, बागमती प्रदेश ०६–००१ ग ०४८४ नम्बरको विद्युतीय माइक्रो, ग.२ ख १६२६ नम्बरको बस, ना.३ च ३२५६ नम्बरको बलेरो र बीएबी ८४७० नम्बरको कार एकपछि अर्को गरी ठोक्किएका थिए ।

प्रहरीका अनुसार दुर्घटनापछि अवरुद्ध सडक अहिले खुलाइएको छ ।