नेपाल पर्वतारोहण संघमा फुर गेल्जे शेर्पाको टिमको विजय

काठमाडौं । नेपाल पर्वतारोहण संघ (एनएमए)को नयाँ नेतृत्वमा फुर गेल्जे शेर्पा अध्यक्ष निर्वाचित भएका छन् । सत्ता गठबन्धनको समर्थनमा उभिएका कुलबहादुर गुरुङलाई पराजित गर्दै फुरले ३४२ मतसहित विजय हासिल गरेका हुन् । गुरुङले २८८ मत पाए ।

शेर्पा नेकपा माओवादी केन्द्र र राष्ट्रिय स्वतन्त्र पार्टी (रास्वपा) निकट पर्यटन व्यवसायीहरूका साझा उम्मेदवार हुन् ।

अध्यक्षसहित अधिकांश पदमा शेर्पा नेतृत्वको टिम विजयी भएको छ भने प्रथम उपाध्यक्ष र एक सदस्य पदमा भने विपक्षी उम्मेदवार विजयी बनेका छन् ।

वरिष्ठ उपाध्यक्षमा ईश्वरी पौडेल ३४५ मतसहित निर्वाचित भए भने प्रतिस्पर्धी टिका गुरुङ २५८ मतमा सीमित भए । प्रथम उपाध्यक्षमा मिङ्मा ग्याबो शेर्पाले ३५९ मत ल्याउँदै काजी शेर्पालाई पराजित गरे । द्वितीय उपाध्यक्षमा बोधराज भण्डारी ३६८ मतसहित विजयी भए ।

महासचिव पदमा राजेन्द्रबहादुर लामा ३१८ मत ल्याएर निर्वाचित भए भने सचिवमा चन्दन थापाले ३५८ मत पाउँदै सफलता हात पारे । कोषाध्यक्ष पदमा भने ङिमा नुर्बु शेर्पा र सुमी लामाले समान ३०४–३०४ मत पाएपछि आधा–आधा कार्यकाल गर्ने सहमति भएको छ ।

सदस्यमा माधवकुमार धमला, केदार न्यौपाने, थुप्देन शेर्पा, गोकुल थापा, मुलाल गुरुङ, देण्डी शेर्पा, विक्रम कार्की, रिञ्जे शेर्पा, देवेन्द्र डंगोल, दिकी शेर्पा र निशा भोटे निर्वाचित भएका छन् ।