रामेछापको भटौली खोलामा बाढीः पक्की पुलमा क्षति, ठूला सवारी सञ्चालन ठप्प

रामेछाप । लगातारको वर्षापछि आएको बाढीले रामेछापको भटौली खोलामा रहेको पक्की पुलमा क्षति पुर्‍याएपछि ठूला सवारीसाधनको आवागमन पूर्ण रूपमा अवरुद्ध भएको छ ।

शुक्रबार रातिदेखिको अविरल वर्षाले खोलामा अचानक बाढी आएको थियो । सो बाढीले मन्थली नगरपालिका–७ र खाँडादेवी गाउँपालिका–४ पकरबास जोड्ने पुलको एक छेउ, विशेषतः पकरबासतर्फको भाग कटान गरेपछि पुलको संरचना कमजोर बनेको हो ।

पुलको एक हिस्सा भत्किएर सडक खोक्रो बनेपछि जोखिम मूल्याङ्कन गर्दै प्रशासनले दुईपाङ्ग्रे बाहेकका सबै प्रकारका सवारीसाधनका लागि पुल प्रयोग गर्न निषेध गरेको छ । प्रमुख जिल्ला अधिकारी श्यामकृष्ण थापाका अनुसार सुरक्षाका दृष्टिले यस्तो निर्णय गरिएको हो ।

पुल जोखिममा परेको जानकारी पाएलगत्तै प्रदेशसभा सदस्य आनन्द श्रेष्ठ, प्रमुख जिल्ला अधिकारी थापा र जिल्लास्थित सुरक्षा निकाय प्रमुखहरूको टोलीले स्थलगत अनुगमन गरेको थियो । निरीक्षणपछि सम्बन्धित निर्माण तथा मर्मत निकायलाई तत्काल उपाय अपनाउन निर्देशन दिइएको थियो ।

स्थानीयवासी केदारप्रसाद ढुंगेलका अनुसार खोलाको कटानले केही संरचना पनि बगाएको छ । खाँडादेवी–४ का वडाध्यक्ष कृष्ण पौडेलले खोलाको कटान सुरु हुँदा नै सम्बन्धित निकायलाई जानकारी गराए पनि समयमै पहल नहुँदा स्थिति नियन्त्रणबाहिर गएको बताए ।

रामेछापको तीन गाउँपालिकालाई सदरमुकाम मन्थलीसँग जोड्ने यो पुल वैकल्पिक राजमार्गको रूपमा समेत प्रयोग हुँदै आएको छ। विशेषगरी खुर्कोटको पुल बगिएपछि दोलखा, ओखलढुंगा र रामेछापका धेरै सवारी यही बाटो हुँदै काठमाडौँ ओहोर–दोहोर गर्दै आएका थिए ।

हाल पनि १५ टनभन्दा बढी तौल बोकेका सवारीसाधन यही मार्ग प्रयोग गरिरहेका थिए । पुलमा क्षति आएपछि यातायात सम्पर्क पूर्ण रूपमा रोकिएको छ, जसले जिल्लाको पूर्वाधार र जनजीवनमा ठूलो असर पारेको छ ।