वर्षाका कारण कांग्रेस महाधिवेशनका क्षेत्रीय अधिवेशन रोकिए

काठमाडौं । प्रतिकूल मौसमका कारण नेपाली कांग्रेसको १५औँ महाधिवेशनअन्तर्गत शनिबारका लागि तय भएका प्रदेशसभा तथा प्रतिनिधिसभा क्षेत्रीय अधिवेशन प्रभावित भएका छन् । लगातारको वर्षापछि विभिन्न जिल्लामा निर्वाचन कार्यक्रम स्थगित गरिएको हो ।

१० असोजमा हुने भनिएका क्षेत्रीय अधिवेशनमध्ये ओखलढुंगा, भोजपुर, रामेछाप, काभ्रेपलाञ्चोक र कास्कीमा निर्धारित कार्यक्रम रोकिएको छ । वर्षाका कारण केही स्थानमा बाँकी रहेका पालिका अधिवेशनसमेत प्रभावित भएका छन् ।

ओखलढुंगामा शनिबार हुने तय भएका प्रदेशसभा र प्रतिनिधिसभा क्षेत्रीय अधिवेशनका सबै कार्यक्रम स्थगित गरिएको छ । नयाँ मिति तथा संशोधित निर्वाचन कार्यतालिकाबारे पछि निर्णय गरिने जनाइएको छ ।

भोजपुरमा भोजपुर नगरपालिका अधिवेशनसँगै प्रदेशसभा र प्रतिनिधिसभा क्षेत्रीय अधिवेशन पनि अर्को सूचना जारी नभएसम्मका लागि स्थगित गरिएको छ । जिल्ला निर्वाचन अधिकृतले सूचना जारी गर्दै अधिवेशन स्थगित भएको जानकारी दिएका छन् ।

रामेछापमा पनि निरन्तरको वर्षाका कारण शनिबारका लागि निर्धारित क्षेत्रीय अधिवेशन रोकिएको छ । त्यहाँ १२ असोज बिहान ७ बजेदेखि प्रदेशसभा तथा प्रतिनिधिसभा क्षेत्रीय अधिवेशन सञ्चालन गर्ने तयारी गरिएको छ ।

काभ्रेपलाञ्चोक–२ मा समेत मौसम प्रतिकूल भएपछि प्रदेशसभा र प्रतिनिधिसभा क्षेत्रीय अधिवेशन स्थगित गरिएको छ । अधिवेशनको नयाँ मितिबारे छुट्टै सूचना जारी गरिने बताइएको छ ।

कास्कीमा पनि केन्द्रीय निर्वाचन समितिको निर्देशनअनुसार क्षेत्रीय अधिवेशन स्थगित गरिएको छ । जिल्ला निर्वाचन अधिकृतका अनुसार त्यहाँ १२ असोजदेखि प्रदेशसभा र प्रतिनिधिसभा क्षेत्रीय अधिवेशन सञ्चालन गरिनेछ ।

यसैबीच, कांग्रेस केन्द्रीय निर्वाचन समितिले शुक्रबार जिल्ला निर्वाचन अधिकृतहरूलाई सम्बन्धित क्षेत्रको मौसम अवस्था मूल्यांकन गरेर निर्वाचन कार्यक्रम अघि बढाउन निर्देशन दिएको थियो ।

समितिका अनुसार मौसम अनुकूल रहेका क्षेत्रमा पूर्वनिर्धारित कार्यतालिका अनुसार नै अधिवेशन गर्नुपर्नेछ । प्रतिकूल मौसम भएका क्षेत्रमा भने १३ असोजभित्र अधिवेशन सम्पन्न हुने गरी आवश्यक व्यवस्था मिलाउन भनिएको छ ।