जेनजी आन्दोलनमा भएको क्षतिको विवरण पठाउन स्थानीय तहलाई सरकारको निर्देशन

काठमाडौं । सरकारले गत भदौ २३ र २४ गते जेनजी आन्दोलनका क्रममा भएको क्षतिको विस्तृत विवरण संकलन गर्न देशभरका सबै स्थानीय तहलाई निर्देशन दिएको छ ।

संघीय मामिला तथा सामान्य प्रशासन मन्त्रालयले ७५३ वटै गाउँपालिका र नगरपालिका कार्यालयहरूलाई पत्राचार गर्दै आवश्यक विवरण अनलाइन पोर्टलमार्फत पठाउन अनुरोध गरेको हो ।

मन्त्रालयद्वारा कात्तिक २७ गते जारी गरिएको पत्रमा आन्दोलनका क्रममा भएको सम्पूर्ण क्षतिको तथ्याङ्क पोर्टलमा प्रविष्ट गर्न सम्बन्धित स्थानीय तहलाई आग्रह गरिएको छ । मन्त्रालयका अनुसार पुनर्निर्माण तथा क्षति व्यवस्थापनका योजना बनाउने उद्देश्यले यस्ता विवरण संकलन आवश्यक भएको हो ।

यसअघि असोज ५ गते बसेको मन्त्रिपरिषद् बैठकले सार्वजनिक सम्पत्ति, भौतिक संरचना तथा निजी प्रतिष्ठानमा परेको क्षतिको मूल्यांकन गर्न पाँच सदस्यीय समिति गठन गरेको थियो । समितिले तथ्य सङ्कलन प्रक्रियामा एकरूपता ल्याउन विशेष अनलाइन पोर्टल तयार पारेको छ, जसमा स्थानीय तहहरूले आफ्नो क्षेत्रअन्तर्गतका सबै कार्यालय तथा संरचनाको क्षतिको विवरण उल्लेख गर्नुपर्नेछ ।

यदि कुनै विवरण छूटिएको भए सोही पोर्टलमार्फत थप जानकारी अपलोड गर्न मन्त्रालयले पुनः आग्रह गरेको छ ।