बागमती कांग्रेसमा नेतृत्व परिवर्तन, लामाले गुमाए दलको नेतृत्त्व

हेटौंडा । बागमती प्रदेश सभामा नेपाली कांग्रेसको संसदीय दलको नेतृत्वमा ठूलो फेरबदल भएको छ । प्रदेशका मुख्यमन्त्रीसमेत रहेका बहादुर सिंह लामा अब दलको नेता रहन पाउने छैनन् ।

आज बसेको संसदीय दलको विशेष बैठकमा लामाविरुद्ध विश्वासको मत प्रस्ताव पारित भएको छ । केन्द्रीय सदस्य तथा पर्यवेक्षक राजन केसीको उपस्थितिमा सम्पन्न बैठकमा लामाको विपक्षमा २२ मत खसेका छन्, भने समर्थनमा १५ मात्र ।

विश्वासको मतसम्बन्धी प्रक्रिया अघि बढाउँदा २१ जना सांसदले औपचारिक रूपमा प्रस्तावमा हस्ताक्षर गरेका थिए । तर अन्तिम मत विभाजनमा एक सांसद थपिएर कुल २२ जनाको समर्थनमा निर्णय पारित भयो ।

यस घटनासँगै बागमती कांग्रेस संसदीय दलको नेताका लागि नयाँ प्रतिस्पर्धा सुरु भएको छ । इन्द्र बानियाँ अब प्रमुख दाबेदारको रूपमा अघि आएका छन् । नयाँ नेता चयन गर्न अब गोप्य मतदानको प्रक्रिया अघि बढाइनेछ ।

दलको नेतामा परिवर्तनले प्रदेशको राजनीतिक समिकरणमा नयाँ तरंग ल्याउने निश्चित देखिएको छ ।