गगन थापा सभापतिमा निर्विरोध निर्वाचित

काठमाडौं । नेपाली कांग्रेसको दोस्रो विशेष महाधिवेशनबाट गगन थापा पार्टी सभापतिमा निर्विरोध निर्वाचित भएका छन् । ६० प्रतिशतभन्दा बढी महाधिवेशन प्रतिनिधिहरूको हस्ताक्षरसहित आइतबारदेखि सुरु भएको विशेष महाधिवेशनले थापालाई सर्वसम्मत रूपमा सभापति चयन गरेको हो ।

विशेष महाधिवेशनले सभापतिसहित सम्पूर्ण पदाधिकारीहरूलाई पनि सहमतिका आधारमा चयन गरेको छ । निर्वाचन समितिका संयोजक सीताराम केसीले बुधबार राति विशेष महाधिवेशन हलमा नवनिर्वाचित पदाधिकारीहरूको नाम सार्वजनिक गरेका थिए । उनका अनुसार पार्टी नेतृत्वलाई एकताबद्ध ढंगले अगाडि बढाउने उद्देश्यका साथ सबै पदमा सहमति जुटाइएको हो ।

नवनिर्वाचित कार्यसमितिअनुसार उपसभापतिमा विश्वप्रकाश शर्मा र पुष्पा भूसाल चयन भएका छन् । यस्तै महामन्त्रीमा गुरूराज घिमिरे र प्रदीप पौडेल निर्वाचित भएका छन्। सहमहामन्त्री पदमा विभिन्न क्लस्टरबाट फरमुल्लाह मन्सुर (मुस्लिम), मुक्ता कुमारी यादव (मधेसी), प्रकाश रसाइली (दलित), डिला संग्रौला पन्त (महिला), बहादुर सिंह लामा (आदिवासी जनजाति), उदयशमशेर राणा (खस आर्य), योगेन्द्र चौधरी (थारू) र कर्ण बूढा (पिछडिएको समुदाय) चयन भएका छन् ।

यसअघि सभापति शेरबहादुर देउवासँग आइतबार बिहानदेखि भएको लामो वार्ता सहमतिमा पुग्न नसकेपछि भृकुटीमण्डपमा जारी विशेष महाधिवेशनले निर्वाचन प्रक्रिया अघि बढाएको थियो । विशेष महाधिवेशन पक्षले देउवालाई पार्टीको सक्रिय भूमिकाबाट अलग राख्दै कांग्रेसले गगन थापालाई भावी प्रधानमन्त्रीका रूपमा घोषणा गरी उनकै नेतृत्वमा निर्वाचनमा जानुपर्ने प्रस्ताव अघि सारेको थियो । तर देउवा पक्षले उक्त प्रस्ताव अस्वीकार गरेपछि विवाद चर्किएको थियो ।

त्यसपछि पार्टी कार्यालय सानेपामा बसेको केन्द्रीय कार्यसमिति बैठकले महामन्त्रीद्वय गगन थापा र विश्वप्रकाश शर्मा तथा सहमहामन्त्री फरमुल्लाह मन्सुरलाई साधारण सदस्यसमेत नरहने गरी कारबाही गर्ने निर्णय गरेको थियो । यस निर्णयले सहमतिका सबै सम्भावना समाप्त भएको विशेष महाधिवेशन पक्षको ठहर छ ।

सहमतिको ढोका बन्द भएको निष्कर्षसहित विशेष महाधिवेशनले निर्वाचन प्रक्रियालाई अन्तिम रूप दिँदै नयाँ नेतृत्व चयन गरेको हो ।

निर्वाचित पदाधिकारी र केन्द्रीय समितिका सदस्यहरूको सूची :