इन्टर मियामीले जित्यो पहिलो पटक एमएलएस कप, मेस्सीका दुई असिस्ट निर्णायक

काठमान्डु । लियोनेल मेस्सीका दुई महत्वपूर्ण असिस्टको मद्दतमा इन्टर मियामीले भ्यानकुभर ह्वाइटक्याप्सलाई पराजित गर्दै इतिहासमै पहिलो पटक एमएलएस कप जितेको छ ।

मियामीले खेलको आठौँ मिनेटमै आत्मघाती गोलको मद्दतले अग्रता लियो । पहिलो हाफको अन्त्यतिर भ्यानकुभर खेलमा फर्किन खोज्दै दुई ठूला अवसर सिर्जना गर्यो । ३८औं मिनेटमा गोलकिपर रोको रियोसले इम्यानुएल साब्बीको शट बचाए, अनि थोमस म्युलरको हेडर बारमाथि बाहिरियो ।

६०औँ मिनेटमा अली अहमदको हल्का प्रहार रियोसको हातबाट चिप्लिएर गोलमा परिणतसँग खेल ११ को स्थितिमा पुग्यो । केही क्षणपछि नै साब्बीले प्रहार गरेका सट पोस्टमा लागेर फर्कियो ।

तर भ्यानकुभरको खुसी धेरैबेर टिकेन । ७१औँ मिनेटमा मेस्सीको सटिक पासको सदुपयोग गर्दै रोड्रिगो दे पाउलले उत्कृष्ट फिनिश गरे । अन्त्यतिर गोलको खोजीमा भ्यानकुभर अगाडि बढिरहँदा मियामीले काउण्टर–अट्याकमार्फत तेस्रो गोल गर्‍यो, जसमा मेस्सीले छातीमा बल नियन्त्रण गरी एक टचमा आलेन्डेका लागि असिस्ट गरे । आलेन्डेले गोलकिपर ताकाओकाको खुट्टामुनि बल छिराउँदै गोल गरे ।

एमएलएस कप अमेरिकाको शीर्ष फुटबल लिग मेजर लिग सकर (MLS) को च्याम्पियनसिप खेल हो । नियमित सिजनपछि प्ले-अफ नाक–आउट टुर्नामेन्ट मार्फत अन्तिम विजेता घोषणा गरिन्छ ।

क्लबका सह–मालिक डेभिड बेकह्यामले २००७ मा एलए ग्यालेक्सीलाई जाँदा पाएको विशेष सम्झौताअन्तर्गत युरो १५.६ मिलियनमा यो फ्र्यान्चाइजी खरिद गरेका थिए । २०१८ मा आधिकारिक रूपमा स्थापना र २०२० मा एमएलएस डेब्यूसँगै सुरु भएको क्लबले आज इतिहास रच्यो ।

बेकह्यामले भने, “हामीले जर्सीमा लेखेका शब्दहरू (freedom to dream) आज पूरा भए । प्रशंसकलाई दिएको वाचा पुरा भयो ।”

८ पटकका बालोन ड’ओर विजेता मेस्सीको २०२३ को आगमन क्लबका लागि मैलापत्थर सावित भयो । उनलाई सहयोग गर्न मियामीले बार्सिलोना साथीहरू(सर्जियो बुस्केट्स, जोर्डी अल्बा, र २०२४ मा लुइस सुारेज) समेत भित्र्यायो ।

मेस्सीले आएको सात खेलमै क्लबलाई पहिलो उपाधि (लिग्स कप २०२३) दिलाए । २०२४ मा सपोर्टर्स’ सिल्ड र ईस्टर्न कन्फरेन्स जिते पनि प्ले-अफमा पराजय भोगे । यस सिजन भने तेस्रो स्थानबाट प्ले–अफमा प्रवेश गर्दै सबै तीन राउन्ड कम्तीमा चार गोलको एग्रिगेटमा जित्दै फाइनलसम्म पुगे ।

बुस्केट्स र अल्बालाई बिदाइ
यो खेल बुस्केट्स र अल्बाको अन्तिम उपस्थिति थियो । मुख्य प्रशिक्षक तथा पूर्व अर्जेन्टिनी स्टार जाभियर माश्चरानोलाई आफ्नो पहिलो ट्रफी सम्हाल्ने अवसर मिल्यो ।

उनले भने, “उनीहरूले यहाँ आएर क्लबको मानसिकता नै परिवर्तन गरे । यसरी करियर समाप्त गर्नु उनीहरूको योग्य सम्मान हो ।”