पासाङ ल्हामु राजमार्गमा चार स्थानमा पहिरो, आवागमन पूर्णरूपमा ठप्प

काठमाडौं । रसुवाको गोसाइँकुण्ड गाउँपालिकाका विभिन्न भागमा पहिरो खस्दा पासाङ ल्हामु राजमार्गको आवागमन पूर्णरूपमा अवरुद्ध भएको छ ।

गाउँपालिका–२ अन्तर्गत तातोपानी डाँडा, बालुवाखानी, फ्याङलुङ र लिङलिङ क्षेत्रमा खसेको पहिरोका कारण राजमार्गको दुवै दिशाबाट सवारी चल्न नसकेको जिल्ला प्रहरी कार्यालयले जनाएको छ ।

तातोपानी डाँडा र बालुवाखानी क्षेत्रमा खसेको पहिरो पन्छाउने प्रयासका लागि इलाका प्रहरी कार्यालय टिमुरेबाट प्रहरी नायब निरीक्षक धनबहादुर तामाङको नेतृत्वमा टोली खटिएको छ । पहिरो खसेको स्थान टिमुरे प्रहरी कार्यालयदेखि करिब ३ किलोमिटर दक्षिणमा पर्दछ ।

यस्तै, फ्याङलुङ र लिङलिङमा खसेको पहिरो हटाउने कामका लागि प्रहरी सहायक निरीक्षक ज्ञानबहादुर थापाको नेतृत्वमा स्याफ्रुबेंशीबाट अर्को प्रहरी टोली परिचालन गरिएको छ ।

दुवै स्थानमा बाटो खुलाउन सुरक्षा निकाय र रसुवागढी हाइड्रोपावरबीच समन्वय भइरहेको प्रहरीले जानकारी दिएको छ ।