पूर्व एन्फा अध्यक्ष पक्राउ, आर्थिक अनियमितताको आरोपमा अनुसन्धान

काठमाडौं । नेपाल प्रहरीले अखिल नेपाल फुटबल सङ्घ (एन्फा) का पूर्वअध्यक्ष कर्मा छिरिङ शेर्पालाई ठगी तथा आपराधिक विश्वासघातसम्बन्धी आरोपमा पक्राउ गरेको छ । प्रहरीको केन्द्रीय अनुसन्धान ब्युरो (सिआइबी) ले शुक्रबार साँझ उनलाई नियन्त्रणमा लिएर अनुसन्धान अघि बढाएको हो ।

सिआइबीका अनुसार शेर्पामाथि हात्तीगौँडामा सञ्चालित टुङ्गराम इन्टरनेशनल एकेडेमीसँग सम्बन्धित करिब ८ करोड ७८ लाख ३० हजार रुपैयाँ बराबरको रकम हिनामिना गरेको आरोप लागेको छ । सोही आरोपका आधारमा आवश्यक अनुसन्धानका लागि पक्राउ गरिएको प्रहरीले जनाएको छ ।

प्रहरीको प्रारम्भिक अनुसन्धानअनुसार विद्यालयको कार्यकारी प्रमुखको जिम्मेवारीमा रहँदा उनले आफ्नो पदको दुरुपयोग गर्दै विभिन्न प्रक्रियामार्फत व्यक्तिगत लाभ लिएको र संस्थालाई आर्थिक नोक्सानी पुर्‍याएको आशंका गरिएको छ ।

यस्तै, भक्तपुरको दधिकोटस्थित २९ रोपनी ४ आना जग्गा विद्यालयको हितविपरीत आफ्नो स्वामित्वसँग सम्बन्धित कम्पनीमा बिक्री गरिएको आरोप पनि अनुसन्धानको विषय बनेको छ । उक्त कारोबार डर, त्रास तथा अनुचित प्रभाव प्रयोग गरी गरिएको हुन सक्ने प्रहरीको दाबी छ ।

सिआइबीले घटनासम्बन्धी थप प्रमाण संकलन र अनुसन्धान जारी रहेको जनाएको छ । अदालतबाट आवश्यक म्याद थप गरी शेर्पामाथि ठगी तथा आपराधिक विश्वासघातसम्बन्धी कसुरमा विस्तृत अनुसन्धान अघि बढाइने प्रहरीले जनाएको छ ।