श्रम संस्कृति पार्टीको चुनावी तयारी तिब्र, साम्पाङले धमाधम टिकट बाँडे

धरान । श्रम संस्कृति पार्टीका संस्थापक तथा धरान उपमहानगरपालिकाका मेयर हर्क साम्पाङले आगामी २१ फागुनमा हुने प्रतिनिधिसभा निर्वाचनलाई लक्षित गर्दै देशभर प्रत्यक्षतर्फका उम्मेदवार चयनलाई तीव्रता दिएका छन् । उनले उम्मेदवारहरूलाई धरानस्थित पार्टीको सम्पर्क सचिवालयमा बोलाएर टिकट वितरण गरिरहेका छन् ।

पार्टी महासचिव आरेन राईका अनुसार कोशी प्रदेश (प्रदेश नं. १) र बागमती प्रदेश (प्रदेश नं. ३) का अधिकांश निर्वाचन क्षेत्रका उम्मेदवार टुंगो लागिसकेका छन् । बाँकी प्रदेश तथा जिल्लामा पनि उम्मेदवार छनोट अन्तिम चरणमा पुगेको उनले बताए । “देशभर प्रत्यक्षतर्फ उम्मेदवारी दिने हाम्रो तयारी छ,” राईले भने, “छोटो समयमै सबै क्षेत्रको टुंगो लगाइन्छ ।”

श्रम, उत्पादन र आत्मनिर्भरताको मुद्दालाई मुख्य एजेन्डा बनाउँदै आएको श्रम संस्कृति पार्टीले वैकल्पिक राजनीतिक शक्तिका रूपमा आफूलाई स्थापित गर्ने दाबी गरेको छ । पार्टी नेतृत्वले परम्परागत राजनीतिक दलहरूबाट निराश भएका मतदातालाई आकर्षित गर्ने रणनीतिसहित स्थानीय स्तरमै सक्रिय व्यक्तिहरूलाई उम्मेदवार बनाइरहेको जनाएको छ ।

हालसम्म पार्टीले धनकुटाबाट सानबहादुर राई, काठमाडौं–१ बाट समीर तामाङ, काठमाडौं–७ बाट मणिराम प्रधान, झापा–१ बाट केबलराम राई, झापा–२ बाट केशब भण्डारी, झापा–३ बाट दीपक तिम्सिना र झापा–४ बाट अमृता राईलाई उम्मेदवार तोकेको छ ।

यसैगरी रामेछामबाट ढालबहादुर मगर, ताप्लेजुङबाट सन्तोष राई, पाँचथरबाट ब्रबिम शेर्मा, संखुवासभाबाट उमा राई, उदयपुर–२ बाट बलराज राई, भोजपुरबाट ध्रुब राई, मोरङ–१ बाट शान्ति पाख्रिन र सोलुखुम्बुबाट बियस राईलाई उम्मेदवार बनाइएको छ ।

पार्टीले आगामी दिनमा थप क्षेत्रका उम्मेदवार सार्वजनिक गर्दै चुनावी अभियानलाई देशव्यापी रूपमा विस्तार गर्ने तयारी गरेको जनाएको छ।