प्रधानसेनापतिसँग भेट गर्न काठमाडौं आइपुगे मेयर साम्पाङ, अन्तरिम सरकारबारे छलफल

काठमाडौं । धरान उपमहानगरपालिकाका मेयर हर्क साम्पाङ काठमाडौं आइपुगेका छन् । बदलिँदो राजनीतिक परिस्थितिका बीच मेयर साम्पाङ काठमाडौं आइपुगेका हुन् ।

बुधबार साँझ राजधानी आइपुग्नासाथ उनी सैनिक मुख्यालय पुगेका थिए, जहाँ प्रधानसेनापति अशोकराज सिग्देलसँग भेटवार्ता भएको छ ।

सैनिक मुख्यालयबाहिर पत्रकारहरूसँग कुरा गर्दै साम्पाङले भने, “दसौं हजार युवाहरूले तपाईं काठमाडौं आउनैपर्छ भनेर बोलाएपछि म यहाँ आएको हुँ ।”

उनका अनुसार प्रधानसेनापतिसँग मुलुकमा बन्ने तयारीमा रहेको अन्तरिम सरकारबारे छलफल भएको थियो । उनले सम्भावित नेतृत्वका रूपमा पूर्व प्रधानन्यायाधीश सुशीला कार्कीको नाम आएको जानकारी पनि दिए ।

पत्रकारहरूले सोधेको ‘कार्कीको नाममा तपाईंको सहमति छ?’ भन्ने प्रश्नमा साम्पाङले जवाफ दिए, “सहमति वा असहमति जनाउने म को हुँ र ? यसमा युवा पुस्ताले नै निर्णय लिने हो ।”

साम्पाङले प्रधानसेनापतिसँगको भेटका अन्य विवरण खुलाएका छैनन्, तर ‘कुराकानी अझै जारी छ’ भनेका छन् ।

सैनिक मुख्यालयबाहिर उनको समर्थनमा युवाहरूको जमघट देखिएको थियो । केहीले साम्पाङलाई अन्तरिम सरकारको नेतृत्व दिनुपर्ने माग गरे भने अर्को समूह काठमाडौंका मेयर बालेन शाहको पक्षमा नाराबाजी गरिरहेको थियो ।

राजनीतिक रूपान्तरणको बहस चुलिँदै गएका बेला हर्क साम्पाङको सक्रियता र सेनासँगको संवाद चर्चाको विषय बनेको छ ।