चीनतर्फ बनेको ताल फुट्यो, रसुवामा फेरि बाढीको जोखिम

काठमाडौं । रसुवाको उत्तरी सीमापारि चीनतर्फ बनेको ठूलो ताल फुटेको खबर प्राप्त भएको छ । रसुवागढीबाट करिब १८ किलोमिटर माथि छोचेन खोला र पुरेपू त्साङ्पो नदीको संगम आसपास बनेको ताल फुटेको जानकारी चिनियाँ पक्षबाट आएको हो ।

गोसाइकुण्ड गाउँपालिकाका अध्यक्ष कैसाङ नुर्पु तामाङका अनुसार चिनियाँ पक्षले केही समयअघि मात्रै ताल फुटेको सूचना पठाएको हो । उनले ताल फुटेको जानकारी पाएलगत्तै सम्बन्धित निकायलाई जानकारी गराइएको बताए ।

जिल्ला प्रशासन कार्यालय रसुवाले पनि चिनियाँ पक्षबाट ताल फुटेको सूचना प्राप्त भएको पुष्टि गरेको छ । प्रमुख जिल्ला अधिकारी नरेन्द्र परियारले ताल फुटेको जानकारी आएको बताएका छन् ।

यसअघि भदौ १० गते भोटेकोसी नदीमा आएको भीषण बाढीका कारण रसुवासहित आसपासका क्षेत्रमा ठूलो जनधनको क्षति भएको थियो । त्यसको प्रभावबाट जनजीवन प्रभावित भइरहेका बेला चीनतर्फ फेरि ताल फुटेको खबर आएपछि भोटेकोसी तथा तटीय क्षेत्रमा थप बाढीको जोखिम बढ्न सक्ने चिन्ता बढेको छ ।

सम्बन्धित निकायले ताल फुटेपछि नदीको बहावमा हुन सक्ने परिवर्तनबारे निगरानी गरिरहेका छन् ।